Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 207 Hüküm no: 353 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gergerizâde Mustafa Fevzi Efendi’den oğlu Mehmed Necib Efendi’ye kalan terekeden İbrahim Ethem Efendi’nin alacağının ödenmesi Ma‘rûz, Üsküdar’da mukaddemâ medyûnen vefât eden mevâlî-i izâmdan Gergerîzâde Mustafa Fevzi Efendi’nin bâ-hüccet-i şer‘iyye dâyini fahrü’l-müderrisîni’l-kirâm sa‘âdetlü es-Seyyid İbrahim Edhem Efendi müteveffâ-yı mezbûrun terekesine vaz‘-ı yedi mütehakkık olan sulbî kebîr oğlu Mehmed Necib Efendi’yi meclis-i şer‘a ihzâr ve muvâcehesinde yedinde olan hüccet-i şer‘iyyede mahkûmun-bih iki yüz altmış beş guruşdan kırk altı buçuk guruş yirmi akçesin ahz, bâkī iki yüz on sekiz guruş kırk akçe hakkını taleb ve da‘vâ ettikde cevâbında babam müteveffâ-yı mezbûrun otuz sekiz bin yirmi beş akçelik terekesi semeninden iktizâ eden beş bin altı yüz akçesini ahz u kabz edip bâkī iki yüz on sekiz guruş kırk akçeden zimmetimi ibrâ ve ıskāt eyledi deyü def‘ini beyân için mehil imhâl olundukda bi’d-defa‘ât mehil tamamında ityân-ı beyyineye kādir olmayıp yemîn vermeğe dahi tâlib olmamağla müteveffâ-yı mezbûrun terekesinden edâya mezbûr Mehmed Necib Efendi’ye tenbîh olunduğu bin elli beş senesi Cemâziyelevveli’nin yirmi sekizinci günü zabt ve tescîl, huzûr-ı âlîlerine i‘lâm olundu. Fî 28 Cumâdelûlâ sene 1155