Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 211 Hüküm no: 363 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksi ve Yanaki’nin Mustafa’nın vekaletiyle Yorgi’ye verdikleri eşyalarının bedelinin ödenmesi talebi Ma‘rûz, Arzuhâl sahibleri Aleksi ve Yanaki nâm zimmîler târih-i i‘lâmdan on altı gün mukaddem bâ-fermân-ı âlî huzûr-ı âlîlerinde akd olunan meclis-i şer‘de hasımları olup arzuhâlde zikrolunan Mustafa ile mürâfa‘a-i şer‘-i şerîf olduklarında mesfûrân Üsküdar ustası Süleyman kullarının koyunlarından hâsıl olan sütünü bey‘ ve şirâ ve kabz-ı semene vekîlleri olduğumuz ecilden târih-i i‘lâmdan üç ay mukaddem mezbûr Mustafa’nın kefâletiyle gāib ani’l-meclis Yorgi v. ( ) nâm zimmîye semen-i ma‘lûma bey‘ ve teslîm eylediğimiz dil peyniri ve çayır peynir ve on iki tulum peynir ve mikdârı ma‘lûm bir fıçı revgan-ı sâde bahâları min-haysü’l-mecmû‘ beş yüz seksen guruşa bâliğ olup meblağ-ı merkūmun iki yüz guruşunu mezbûr Mustafa bi-hükmi’l-kefâle merkūm Süleyman Usta’ya edâ edip bâkī üç yüz kırk dört guruşu kaldı deyü da‘vâ eylediklerinde ol dahi yine zimmî-i mesfûr Yorgi mezbûr Süleyman Usta’dan iştirâ eylediği on üç bin vakıyye süt bahâsı olan üç yüz kırk dört guruşdan iki yüz guruşunu edâ, bâkī yüz dört guruş kefâleten mezbûr Süleyman Usta’ya deyni olduğunu ikrâr, mâ‘âda zikrolunan peynir ve yağ maddelerini kefâletine bi’l-külliye inkâr etmekle mesfûrân Yanaki ve Aleksi da‘vâ-yı mezkûrlarını beyân için şâhide havâle olunmuş idi, lâkin merkūm Mustafa âhar mahâlde mürâfa‘a olmak için fermân-ı âlî ibrâz eylediği bi’l-iltimâs huzûr-ı âlîlerine i‘lâm olundu. Fî 8 Cumâdelâhire sene 1155