Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 215 Hüküm no: 370 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavroz köyünde Rabia’dan vârislerine kalan miras davasındaki iddialarının geçersiz olduğu Ma‘rûz, Derûn-ı arzuhâlde zikrolunan İstavros karyesinde sâkine iken mukaddemâ vefât eden Râbia’nın verâseti sagīr oğlu Yahya ve sagīre kızı Zeyneb’e ve kebîre kızları Âişe ve Hatice ve Sâliha ve Fâtıma’ya munhasıra olduğu mütebeyyin oldukdan sonra zâtı mu‘arrefe olan mezbûre Âişe karye-i mezbûrede vâki‘ bir bâb yalı menzili ile bir bâb bağçenin şâyi‘ân nısflarına ber-vech-i âtî vaz‘-ı yedleri mütebeyyin olan kendi tarafından asîl ve zevcesi mezbûre Zeyneb tarafından vekîl sahib-i arzuhâl el-Hâc Halil muvâcehesinde anam müteveffât-ı mezbûrenin terekesinden olan yalı menzili ile bağçede hisse-i ma‘lûmemi zevcân-ı mezbûrân bî-vech zabtederler deyü da‘vâ ettikde mezbûr el-Hâc Halil dahi cevâbında vaz‘-ı yedlerini ikrâr lâkin müteveffât-ı mezbûrenin hîn-i fevtinde mezbûrât Âişe ve Fâtıma ve Hatice ve Sâliha âhar terekeden hisselerini ahz ve istifâ edip mârrü’z-zikr yalı ve bağçe müvekkilem mezbûre ile Yahya için ifrâz olunup ve mezbûre Âişe’nin yalı ve bağçede alâkası olmadığını nâtık bin yüz otuz târihiyle müverrah Üsküdar kādısı Selim Efendi imzâsıyla mümzâ ve mahtûm ibrâ hücceti ve yine bin yüz otuz iki senesi târihiyle müverrah iki kıt‘a i‘lâmlarda Yahya ve Zeyneb’in hisseleri için ifrâz olunduğu musarrah olup ve i‘lâmı mûcebince amel olunmak deyü fermân olunmuş iken yedinde olan i‘lâmlar ve hüccet-i şer‘iyyenin mazmûnlarını isbât etmeğe ikāmet-i beyyine eyledikde mezbûre Âişe gaybet edip mezbûr Halil’in yedinde olan senedât mûcebince mezbûrenin iddi‘âsı müzevver olup muvâcehesinde şâhid ikāmet olundukda âhar mahâlde görülmek üzere fermân ibrâz edip ancak ta‘cîz olduğu bi’l-iltimâs huzûr-ı âlîlerine i‘lâm olundu. Fî 10 Cumâdelâhire sene 1155