Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 216 Hüküm no: 372 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb ile komşusu Hatice Hatun arasındaki anlaşmazlığın giderildiği Ma‘rûz, Vârid olan fermân-ı âlîlerine imtisâlen taraf-ı şer‘den irsâl olunan Mehmed Efendi dâ‘îleri mi‘mâr hulefâsından Süleyman Halîfe ve İbrahim Halîfe ile sahibe-i arzuhâl Zeyneb’in câr-ı mülâsıkı Hatice Hatun’un menziline varıp cemâ‘at-i Müslimîn huzûrlarında akd-i meclis-i şer‘-i âlî ettikde mezbûre Hatice kendi menzilinin sakfı üzerinde müceddeden ihdâs eylediği tahta-pûşundan sahibe-i arzuhâlin makarr-ı nis[vâ]n olan mahâlline havâlesi olduğu ba‘de’l-mu‘âyene havâlesini def‘a tenbîh olundukdan sonra yine mezbûre Zeyneb menzilinin pencereleri önünde vâki‘ tûlen altı zirâ‘ ve arzen yirmi bir parmak damlalığını mezbûre Hatice bi-gayr-ı hakkın zabteder deyü eylediği da‘vâsında bâ-vesâtet-i muslihîn fâriğa ve mezbûre Hatice dahi zikrolunan tahta-pûşunun iki aded nerdübânını mezbûre Zeyneb’in penceresi tarafından ref‘ ve kendi odası üzerinden vaz‘ ve tahta-pûşuna tûlen üç ve kadden yine üç zirâ‘ kestane tahtasından kapaklama perde binâ etmek ile havâlesi zararını def‘e ta‘ahhüd ve bu vechile beynleri tevfîk ve ıslâh olunduğu mezbûr dâ‘îleri mahâllinde tahrîr, ba‘dehû ümenâ-i şer‘le meclis-i şer‘a gelip inhâ eylediği bi’l-iltimâs huzûr-ı âlîlerine i‘lâm olundu. Fî 7 Cumâdelâhire sene 1155