Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 217 Hüküm no: 375 Orijinal metin no: [61b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Halil’in evine saldıran Bostancı Mehmed’ten şikayetçi olduğu Ma‘rûz, Vâki‘ olan mevâddı istimâ‘ için cânib-i şer‘-i Nebevî’den irsâl olunan Ahmed Efendi dâ‘îleri Vânî karyesinde câmi‘-i şerîfe içinde akd eylediği meclis-i şer‘de sahib-i arzuhâlde Molla Halil hasmı olup meclis-i mezkûra ihzâr ettirdiği Bostânî Mehmed ile ba‘de’l-mürâfa‘a târih-i i‘lâmdan bir gece mukaddem sâ‘at dörtde menzilim derûnuna duhûl ve iyâlimi fi‘l-i şenî‘ kasdettikde mezbûr ile iki sâ‘at mikdârı arbede eylediğimde mezbûrun libâslarını dahi bırakdırdım deyü mûcebini ba‘de’d-da‘vâ cevâbında mezbûr Mehmed libâs kendimde olup yolda gider iken aldı deyü ikrâr, menzile duhûlünü inkâr etmekle karye-i mezbûre ahâlîsinden mazbûtü’l-esâmî on dört nefer kimesneler mezbûr Mehmed eşkıyâdan olup sâbıkası olduğunu ve mezbûr Mehmed’in babası [62a] olup Kule bağçesi ustası Yusuf nâm kimesnenin i‘ânetiyle karye-i mezbûre sükkânının bir türlü emn ü râhatımız yokdur deyü her biri mezbûrânın muvâcehesinde sû’-i hâllerini ihbâr eylediklerini mezbûr dâ‘îleri mahâllinde tahrîr ve ümenâ-i şer‘le gelip inhâ ve ihbâr etmeğin fermân-ı âlîlerine imtisâlen huzûr-ı âlîlerine i‘lâm olundu. Fî 12 Cumâdelâhire sene 1155