Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 225 Hüküm no: 391 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çengelköy’de Saltane ile Hürmüz’ün boşandıkları (bâyinen) Ma‘rûz, Vâki‘ olan mevâddı istimâ‘ için cânib-i şer‘den irsâl olunan Ahmed Efendi dâ‘îleri Üsküdar’a tâbi‘ Çenger karyesine varıp ba‘de akdi’l-meclis derûn-ı arzuhâlde mezkûreti’l-ism Saltane Nasrâniyenin babası ve tarafından vekîli sahib-i arzuhâl Palaş zimmî meclis-i mezkûra ihzâr ettirdiği dâmadı Hürmüz ile ba‘de’l-mürâfa‘a mezbûr Hürmüz zevcesi müvekkile-i mezbûreye bi-tarîkı’l-emâne teslîm eylediği zincirli ve zer-i mahbûb yirmi bir aded altının on beşini müvekkile-i mezbûre yedinden ahz u kabz ve zevcesi mersûme Saltane’yi bâyinen tatlîk eyledikden sonra bâkī kalan altı aded zincirli ve zer-i mahbûb altından ve ibtidâ-i zevciyetten târih-i i‘lâma gelince beynlerinde cereyân eden ahz u i‘tâ ve mu‘âmelât-ı şettâya ve gayra mü‘allika âmme-i de‘âvîden her biri âharın zimmetlerini ibrâ ve ıskāt edip bu vechile kat‘-ı nizâ‘ ve fasl-ı husûmet eylediklerini mezbûr dâ‘îleri mahâllinde tahrîr ba‘de[hû] ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve ihbâr eylediği bi’l-iltimâs huzûr-ı âlîlerine i‘lâm olundu. Fî 18 Cumâdelâhire sene 1155