Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 225 Hüküm no: 393 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toygar Hamza mahallesinde oturan Fatma’nın Safiye Hatun’a hizmet ettiğini ispatlayamadığı Ma‘rûz, Üsküdar’da Toygar Hamza mahallesinde sâkine zâtı mu‘arrifeyn ta‘rîfleriyle mu‘arrefe olan Fâtıma hasmı olup kezâlik zâtı mu‘arrifeyn ta‘rîfleriyle mu‘arrefe olan Safiye nâm hatun ile mürâfa‘a-i şer‘-i şerîf olduklarında mezbûre Fâtıma bin yüz elli bir ve elli iki ve elli üç senelerinde mezbûre Safiye alîle olmağla ücret tesmiye olunmaksızın emr ve talebiyle kendüye üç sene hizmetim sebkat edip hâlâ ben ücretle hizmet eder makūlesinden olmamağla ber-mûceb-i fetvâ-yı şerîf müddet-i mezbûrede hizmetimin ecr-i mislini taleb ederim deyü ba‘de’d-da‘vâ ve’l-inkâr müdde‘iyye-i mezbûre da‘vâ-yı mezkûresini beyân-ı isbât için şâhide havâle ve imhâl olunup müddet-i mehil tamamında ityân-ı beyyineye kādire olmamağla mezbûre Safiye bi’t-taleb tahlîf olunmağın müdde‘iyye-i mezbûre bilâ-beyyine bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 23 Cumâdelâhire sene 1155