Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 227 Hüküm no: 396 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Mehmed Çelebi’nin boş evi avlusundaki kuyuda bulunan kadının katillerinin araştırıldığı, Zoli ve eşi Panayot’un zanlı oldukları Ma‘rûz, Bundan akdem Üsküdar’da Selâmi Efendi’nin kefere mahallesinde vâki‘ Keresteci Mehmed Çelebi’nin hâli ve harâb menzili havlusunda olan kuyuda mahnûkaten katl bulunan ismi nâ-mâlûm avratın kātilleri tefahhus olunmak bâbında şeref-bahş-ı sudûr eden fermân-ı âlîlerine imtisâlen bostancıbaşı ağa kulları tarafından ta‘yîn olunan Hüseyin Haseki ve Üsküdar Usta kulları ma‘rifetleriyle <> mazanne olan kimesneler tefahhus olundukda târih-i i‘lâmdan on beş gün mukaddem mahalle-i mezbûrede sâkine Zoli nâm avratın menziline zevcesinin kız karındaşları ma‘an bir avrat ve bir zimmî ve bir çukadâr misâfir olmak üzere geldiğini ve ba‘dehû kuyudan çıkan ol avrat olduğunu mahalle-i mezbûr ahâlîsinden dört nefer zimmîler haber vermeleriyle mesfûre Zoli ve zevci Panayot ihzâr ve istintâk olunduklarında mesfûre Zoli fi’l-hakīka zevcimin kız karındaşıyla bir avrat ve bir çukadâr müsâfiret vechi üzere menzilime gelip gece ile zevcim merkūm Panayot dahi gelip benim üzerime bıçak ile hücûm ve beni darb kasdettikde ben menzilimden firâr eylediğimde zevcim kalıp ba‘dehû kuyudan ihrâc olunan avrat ol avrat olduğunu mu‘âyene eyledim deyü takrîr eyledikde zevci mesfûr Panayot bi’l-külliye inkâr etmeğin ahâlî-i mahalle-i merkūmeden papas ve kethudâ ve sâir mahalle-i mezbûre ahâlîsinden mazbûtü’l-esâmî zimmîler mersûm Zoli ve civârı Maryem nâm Nasrâniyeler kendileri fâhişe olduklarından mâ‘adâ nâ-mahrem nisvân ve ricâli menzillerine cem‘ ve şurb-i hamr ve fısk u fesâd edip ve mersûme Zoli’nin zevci Panayot dahi dâimâ bıçak ile halkı darb ve cerh etmek âdet-i müstemirresi olup ve bundan akdem zeytinci bir zimmîyi katleylediği ma‘lûmumuz merkūm Panayot’dan ve mezbûretân Zoli ve Maryem’den emîn değilleriz deyü bi’l-muvâcehe şehâdet edip zevcesi mezbûre Zoli Nasrâniye dahi zevc-i mezbûr Panayot yedinde helâkin i‘tirâf eder hemen ben Müslüman olur halâs olurum, sonra sen benim elimden nice olursun deyü tahvîf eylediğini mübâşir kulları dahi haber verirler, ma‘lûm-ı devlet oldukda emr [u] fermân men lehu’l-emrindir. Fî 26 Cumâdelâhire sene 1155