Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 227 Hüküm no: 397 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar iskelesinde belirtilen sayıda sergiye izin verildiği Ma‘rûz, Arzuhâl sahibleri Üsküdar iskelesinde sergi edip yaş yemiş füruht edenler hakkında ahâlî ağzından iki gün mukaddem ibâdullâha mazarrâtları vardır, men‘ ve def‘ olunmaları için arzuhâl ve fermân-ı âlî sâdır olmağla mezbûrların def‘i için tenbîh olundukda mezbûrlar dahi arzuhâl manav tâifesinindir, ahâlînin haberleri yokdur, keyfiyet-i ahvâlimiz ahâlîden suâl olunsun deyü arzuhâl etmeleriyle vârid olan fermân-ı âlîlerine imtisâlen keyfiyet-i ahvâlleri ahâlîden suâl olundukda fi’l-hakīka arzuhâl-i mezkûrdan haberleri olmayıp mezbûrlar alıp sattıkları kavun, karpuz ve üzüm ve sâir meyveyi manav tâifesinden noksan bahâ ile füruht edip fukarâya enfa‘ olduklarını cemm-i gafîr müseccelü’l-esâmî bî-garaz Müslimîn inhâ ve ihbâr ettiklerinde tâife-i mezbûrdan Cafer Ahmed ve Hüseyin ve es-Seyyid Ali ve Hasan ve Boşnak Ahmed ve altı nefer şerîkleriyle birbirlerine kefîl ve iskele-i mezbûrda altı mahâlde sergi edip ve el-Hâc İbrahim şerîki Mustafa ile dahi Vâlide-i Cedîd kapısında bir sergi edip mâ‘adâsı def‘ ve ziyâde olmamak üzere ve bu vechile nizâm buldukları ahâlî kulları iltimâsı Üsküdar’da ba‘de’t-tescîl mübâşirleri Mustafa Çavuş kulları iltimâsıyla huzûr-ı âlîlerine i‘lâm olundu. Fî 16 Cumâdelâhire sene 1155