Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 61 Hüküm no: 52 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Deniye bt. Mıgırdıç’ın yarım hisse bağını kardeşine sattığı Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkine olup şahsı zeyl-i vesîkada muharrerü’l-esâmi kimesneler ta‘rîfleriyle mu‘arrefe olan Deniye bt. Aci Mıgırdıç nâm Nasrâniye meclis-i şer‘-i hatîrde li-ebeveyn kız karındaşı olup şahsı kezâlik mu‘arrefe olan işbu râfi‘atü’r-rakīme Gül Nasrâniye muvâcehesinde bi-tav‘ihâ ikrâr ve takrîr-i kelâm edüp akd-i âti’z-zikrin sudûruna değin yedimde mülk-i mevrûsem olup Maldepe toprağında vâki‘ iki tarafı eniştem Serkis bostanı ve bir tarafı Aci Bogosoğlu Nikogos bağı ve bir tarafı tarîk-i âm ile mahdûd tahmînen dört dönüm kürûmî mülk bir kıt‘a harâb dut bağın nısfı benim ve nısf-ı âharı karındaşım mesfûre Gül Nasrâniyenin olmağla el-hâletü hâzihi ben bağ-ı mezkûrda olan nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşteriye-i mesfûreye yüz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl edüp semeni olan meblağ-ı mezkûr yüz guruşu müşteriye-i mesfûre [11a] yedinden tamâmen ahz ü kabz eyleyüp bağ-ı mezkûrda olan nısf hissenin gabn ve tağrîrine müte‘allıka âmme-i da‘vâdan müşteriye-i mesfûre Gül Nasrâniyenin zimmetini ibrâ-i âm ile ibrâ ve iskāt eyledim fîmâ-ba‘d [bağ-ı] mahdûd-ı mezkûrun nısf hisse-i şâyi‘inde vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup bağ-ı mahdûd-ı mezkûrun ırsen ve şirâen mecmû‘u müşteriye-i mesfûre Gül Nasrâniyenin mülk-i mahzı olmuşdur keyfe mâ-teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Cemâziyelâhir li-sene tis‘a ve seb‘în ve mi’ete ve elf. Şuhûdü’l-hâl: Voyvoda Süleyman Ağa, Voyvoda-i sâbık Ahmed Ağa, Serdâr Mehmed Ağa, el-Hâc Mahmud Ağa, Kara Ahmed Beşe. Değirmenci Kirkor, Dikici Avak, Ohan v. Marat, Demirci Agop.