Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 61 Hüküm no: 51 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gül bt. Aci Mıgırdıç’ın yarım hisse bağını kardeşine sattığı Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkine olup şahsı zeyl-i vesîkada muharrerü’l-esâmi kimesneler ta‘rîfleriyle mu‘arrefe olan Gül bt. Aci Mıgırdıç Nasrâniye meclis-i şer‘-i hatîrde li-ebeveyn kız karındaşı olup kezâlik şahsı mu‘arrefe olan işbu râfi‘atü’r-rakīme Deniye Nasrâniye muvâcehesinde bi-tav‘ihâ ikrâr ve takrîr-i kelâm edüp akd-i âti’z-zikrin sudûruna değin yedimde mülk-i mevrûsem olup kasaba-i mezbûre toprağında Draman Ayazması kurbünde vâki‘ bir tarafı Seraboğlu Bedros bostanı ve bir tarafı Musa Ağa bağı ve bir tarafı Kel Bogos veresesi bağı ve bir tarafı tarîk-i âm ile mahdûd tahmînen altı dönüm kürûmî mülk bir kıt‘a ve bir aded su kuyulu kış bağın nısfı benim ve nısf-ı âharı ırsen karındaşım mesfûre Deniye Nasrâniyenin olmağla el-hâletü hâzihi ben bağ-ı mezkûrda olan nısf hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i mesfûreye iki yüz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl edüp semeni olan meblağ-ı mezkûr iki yüz guruşu müşteriye-i mezbûre Deniye yedinden tamâmen ahz ü kabz edüp bağ-ı mezkûrda nısf hissenin gabn ve tağrîrine müte‘allıka âmme-i da‘vâdan müşteriye-i mesfûre Deniye’nin zimmetini ibrâ ve iskāt eyledim fîmâ-ba‘d mârrü’z-zikr bağın nısf hisse-i şâyi‘amda kat‘â alâka ve medhalim kalmayup bağ-ı mezkûrun ırsen ve şirâen mecmû‘u müşteriye-i mesfûrenin mülk-i mahzı olmuşdur keyfe mâ-teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Cemâziyelâhir li-sene tis‘a ve seb‘în ve mi’ete ve elf. Şuhûdü’l-hâl: Voyvoda Süleyman Ağa, Voyvoda-i sâbık Ahmed Ağa, Serdâr Mehmed Ağa, el-Hâc Mahmud Ağa, Kara Ahmed Beşe. Değirmenci Kirkor, Dikici Avak, Ohan v. Marat, Demirci Agop.