Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 230 Hüküm no: 403 Orijinal metin no: [65a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’in İshak Efendi’nin cebinden gizlice aldığı altınları teslim etmesi Ma‘rûz, Üsküdar’da Yakub Paşa Yalısı demekle ma‘rûf olan yalıda sâkin İshak Efendi nâm kimesnenin etbâ‘ından Osman yine mezbûr İshak Efendi etbâ‘ından olup zikrolunan yalıda ma‘an sâkin İbrahim nâm şâbb-ı emredi meclis-i şer‘a ihzâr ve muvâcehesinde mezbûr İbrahim târih-i i‘lâmdan yirmi beş gün mukaddem gece ile esvâbımın cebinden zer-i mahbûb ve fındık altını mahlût min-haysü’l-mecmû‘ yüz on guruşumu hufyeten ahz ü gasb ve umûruna sarf ü istihlâk eyledi deyü meblağ-ı merkūmu mezbûr İbrahim’den taleb ve da‘vâ eyledikde ol dahi cevâbında müdde‘î-i mezbûrun cebinden ber-minvâl-i muharrer ancak yüz guruşu ahz ve anası hâzıra bi’l-meclis olan Âişe’ye verip bu vechile istihlâk eylediğini ikrâr ve ziyâdesi olan on guruşu inkâr edecek, mezbûre Âişe dahi istintâk olundukda oğlu mezbûrun yedinden aded beyân etmeksizin mechûlü’l-mikdâr altınları ahz ve gāib ani’l-meclis karındaşına verdiğini mu‘terîfe olmağın mezbûr İbrahim’in ikrârı mûcebince meblağ-ı merkūm yüz guruşu müdde‘î-i mezbûra edâ ve teslîme merkūm İbrahim’e tenbîh olunduğu şüd. Fî-gurreti Recebi’l-ferd sene 1155