Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 232 Hüküm no: 407 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavroz köyünde oturan Fatma ile komşusu Ömer Ağa’nın evleri konusundaki davada birbirlerine olan zararlarının engellenmesi Ma‘rûz, Vârid olan fermân-ı âlîlerine imtisâlen taraf-ı şer‘den irsâl olunan Ahmed Efendi d[â‘îleri] izzetlü mi‘mâr ağa tarafından ta‘yîn olunan İbrahim Halîfe ve Halil Halîfe ile Üsküdar’da İstavros karyesinde vâki‘ sahibe-i arzuhâl Fâtıma’nın menziline varıp cemâ‘at-i Müslimîn huzûrlarında akd-i meclis-i şer‘-i şerîf ettikde mezbûre Fâtıma câr-ı mülâsıkı Ömer Ağa’nın tarafından vekîli Abdullah Ağa ile mürâfa‘a-i şer‘-i şerîf olduklarında mezbûre Fâtıma’nın menzili sakfının tûlen altı buçuk zirâ ve arzen on sekiz parmak saçağının damlası müvekkil-i mezbûrun menzili dâhilinde olup târih-i i‘lâmdan iki sene mukaddem müceddeden binâ ihdâs eylediği sed duvar üzerine kadîmden bi-hakkın cereyân edip damlasının hak ve cereyânı olduğu el-Hâc Ali b. Süleyman ve Mehmed b. Mustafa ve Mehmed Beşe b. Abdullah nâm kimesneler şehâdetleriyle vekîl-i mezbûrun muvâcehesinde vech-i şer‘î üzere sâbit oldukdan sonra yine mezbûre Fâtıma’nın zikrolunan menzilinin sofa ve bir bâb odasının ziyâsı kadîmi pencerelerine munhasır iken yine müvekkil-i mezbûr zikrolunan pencerelerinin önüne târih-i mezkûrda mürtefi‘ ebniye ve duvar ihdâs eylediği yine şâhidân-ı mezbûrân şehâdetleriyle ba‘de’s-sübût zikrolunan ebniye [ve] duvar mezbûre Fâtıma’nın menzilinin mahâll-i mezkûrunun ziyâsını sed ve gāyet karanlık olup zarar-ı fâhiş olduğu mu‘âyene olundukdan sonra müvekkil-i mezbûr Ömer Ağa merkūme Fâtıma’nın zikrolunan damlasının cereyânına mümânâ‘at etmeyip ve bu minvâl-i muharrer ziyâsının zarar-ı şer‘îsini def‘ etmek üzere mezbûr dâ‘îleri vekîl-i mezbûra tenbîh eylediğini merkūm dâ‘îleri mahâllinde tahrîr ba‘dehû meclis-i şer‘a gelip inhâ eylediği huzûr-ı âlîlerine i‘lâm olundu. Fî 3 Recebi’l-ferd sene 1155