Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 233 Hüküm no: 409 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vârislerinden Mustafa’nın hasmı Avakim’in varislerinden taleb ettiği alacağına dair gösterdiği kişilerin şahitliklerinin uygun görülmediği Ma‘rûz, Derûn-ı arzuhâlde mezkûr olup mukaddemâ vefât eden eş-Şeyh Mustafa’nın verâseti li-ebeveyn kız karındaşları Âişe ve Safiye ile usûbet-i nesebiye cihetinden li-ebeveyn ammioğlu Cüneyd’e ve diğer li-ebeveyn ammioğlu sahib-i arzuhâl el-Hâc Mustafa’ya munhasıra olduğu müte‘ayyen oldukdan sonra mezbûr el-Hâc Mustafa hasmı olup bundan akdem hâlik olan Avakim v. Murad v. ( ) nâm zimmînin veresesinden sulbî kebîr oğlu Garih? ile sulbiye kebîre kızı Zümrüd muvâcehelerinde işbu yedimde olan deyn temessüğü mûcebince hâlik-i merkūm hâl-i hayatında bin yüz elli bir senesi Muharrem’i gurresinde mûrisim müteveffâ-yı mezbûr eş-Şeyh Mustafa’dan cihet-i karz-ı şer‘îden beş yüz guruş istidâne ahz u kabz ve sarf ve istihlâk [etti] deyü ba‘de’d-da‘vâ ve’l-inkâr müdde‘î-i mezbûr ibrâz eylediği temessükde ancak üç nefer muharrerü’l-esâmî şâhidleri olup biri fevt oldu deyü hayatda olan Ahmed ve Yusuf nâm kimesneleri şâhid olmak üzere ikāmet eyledikde mezbûr Ahmed müteveffâ-yı mezbûr eş-Şeyh Mustafa hâlik-i merkūma beş yüz guruş idâne eylediğini yine mezbûr eş-Şeyh Mustafa’nın lisânından istimâ‘ eyledim deyip ve mezbûr Yusuf hâlik-i mezbûru ismi Vasil’dir deyü takrîr etmekle mezbûrân Ahmed ve Yusuf vech-i şer‘î üzere edâ-i şehâdet-i şer‘iyye etmeğin şehâdetleri makbûle olmayıp müdde‘î-i mezbûr şâhid-i âhar ikāmeti için bi’d-defa‘ât imhâl olundukda bir vechile ityân-ı beyyineye kādir olmayıp yemîn vermeğe dahi tâlib olmadığından mâ‘adâ husûs-ı mezbûrda tezvîr münfehim olmağın müdde‘î-i mezbûr bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 7 Recebi’l-ferd sene 1155