Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 233 Hüküm no: 410 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da oturan Süleyman b. Osman’ı yaralayıp gasp edenlerin cezalandırılması Ma‘rûz, Üsküdar’da sâkin Süleyman b. Osman husemâsından Ahmed b. Mustafa ve diğer Süleyman b. Abdullah muvâcehelerinde mezbûrân Ahmed ve diğer Süleyman refîkleri gāibûn ani’l-meclis Veli ve İncioğulları Aleksan ve Tatos nâm zimmîler ile târih-i i‘lâmdan on yedi gün mukaddem ba‘de’l-mağrib Üsküdar’da Yeni mahalle sokağında üzerime hücûm ve mezbûrân Ahmed ve diğer Süleyman ile mezbûr Veli sopa ile sol koluma ve sağ elimin orta parmağına ve sâir etrâfıma darb ve kara bere ve bıçak ile kalça ta‘bîr olunan mahalle darb ve cerh ve yine mezbûrûn sopa ile ve gāibân-ı mezbûrân Aleksan ve Tatos taş cümlesi başımın beş yerinden darb ve cerh ve sâir a‘zâmı kara bere eylediklerinden sonra üzerimden an-nakdin altmış üç guruş bir zolata ve yirmi guruş kıymetli bir çifte sîm bıçak ve altı guruş kıymetli bir çuka binişimi ahz ü gasb eylediler deyü ba‘de’d-da‘vâ ve’l-inkâr müdde‘î-i mezbûru takrîr-i meşrûhu üzere mezbûrân Ahmed ve diğer Süleyman refîkleri gāibûn-ı merkūmûn ile ma‘ân ber-vech-i muharrer darb ü cerh ve kara ve bere eyledikleri Mustafa b. Mehmed ve Salih b. Mehmed nâm kimesneler şehâdetleriyle mezbûrânın muvâcehelerinde sâbit olmağın mûceb-i şer‘îsi zikrolunan cerhlerin be’rlerine tevkīf olunup müdde‘î-i mezbûr mâ‘adâ müdde‘âsını beyân ve isbâta havâle olunduğu bi’l-iltimâs huzûr-ı âlîlerine i‘lâm olundu. Fî 9 Recebi’l-ferd sene 1155