Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 238 Hüküm no: 418 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Odabaşı’nın varislerinden Hatice’nin Halil’den alacağı olmadığı Ma‘rûz, Gekvize ahâlîsinden iken mukaddemâ fevt olan Mehmed Odabaşı’nın veresesinden li-ebeveyn kız karındaşı sahibe-i arzuhâl Hatice hasmı es-Seyyid Halil ile Dîvân-ı âlîlerinde ma‘kūd meclis-i şer‘de mürâfa‘a olduklarında mezbûre Hatice mûrisi müteveffâ-yı mezbûr Mehmed Odabaşı hayatında mâlından bir …? içinde bin aded fındık altınını ve yedi kîselik zimem temessüğünü kasaba-i mezbûrede es-Seyyid Halil’e emânet vaz‘ ve teslîm eyledi deyü ba‘de’d-da‘vâ ve’l-inkâr şâhid ikāmeti için Üsküdar mahkemesine havâle olundukda mezbûre Hatice’nin ikāmet eylediği Akşehir kazâsından olup İstanbul’da sâkin es-Seyyid Ramazan ve yine İstanbul’da sâkin Yusuf ve Yahya nâm kimesneler şehâdet edip lâkin müteveffâ-yı mezbûrun babası ve dedesi isimlerini zikredemediklerinden mâ‘adâ mezbûr es-Seyyid Mustafa Akşehir’den gelirken ve merkūm Yusuf dahi İznik’den gelirken müteveffâ-yı mezbûrun ziyâretine vardıkda deyü ber-takrîb beyân ve mezbûr Yahya dahi mezbûr es-Seyyid Halil’in zevcesi Âmine ile ikisine verdiler deyü takrîr etmekle şübhe olunup mahâllinden ihtiyâten şâhid taleb olundukda müdde‘iye-i mezbûrenin şâhide olmak üzere haber verdiği kimesneler ihzâr ve istintâk olunduklarında bi’l-külliye ma‘lûmları olmadığından mâ‘adâ mezbûr Mehmed Odabaşı zî-kudret ve mâldâr olmayıp ancak esâmesi ulûfesiyle ta‘ayyüş eder deyü kazâ-i mezbûr ahâlîsi taraflarından senevî kırkar ellişer guruş ücretle şehir kethudâlığı idi, derd-mend makūlesinden olup bu kadar mâla mâlik olmamışdır, husûs-ı mezbûr kizb ve tezvîr ve şâhidleri şâhid-i zûrdur deyü kasaba-i mezbûre ahâlîsinin ihtiyâr ve a‘yânı haber verip ve bundan akdem İstanbul kādısı efendi huzûrunda on beş gün mikdârı mürâfa‘a ve isbâta kādire olmayıp ve mezbûr es-Seyyid Halil’in yedinde olan hüccet-i şer‘iyye mûcebince mukaddemâ Gekvize nâibi huzûrunda mezbûrun zevcesi Fâtıma ile mezbûr es-Seyyid Halil ve zevcesi Âmine’den da‘vâ ve isbât edemeyip tahlîf dahi etmeğin bu makūlelerin da‘vâlarına iltifât olunmamak sedd-i bâb-ı? tezvîre esir olmağla ol bâbda emr [u] fermân men lehu’l-emrindir. Fî 14 Recebi’l-ferd sene 1155