Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 237 Hüküm no: 417 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Gülfem mahallesinde oturan Mehmed, eşi Ümmügülsüm ve Fatma’nın kötü hallerinden dolayı mahalleden çıkarılmaları Ma‘rûz, Üsküdar’da Gülfem mahallesi imâmı Ahmed Efendi ve cemâ‘atından mazbûtü’l-esâmî on nefer mikdârı bî-garaz Müslimîn meclis-i şer‘de yine mahalle-i mezbûrede sâkin Mehmed nâm kimesne muvâcehesinde mezbûr Mehmed ve zevcesi Ümmügülsüm kayınanası Fâtıma kendi hâllerinde olmamalarıyla nâ-mahremden ictinâb etmeyip menzillerine ecnebi kimesneler alıp fısk u fesâd âdetleri olmağla bundan akdem mezbûrlara bi’d-defa‘ât tenbîh olundukda mütenebbihler olmayıp hatta târih-i i‘lâm gecesi Üsküdar kolluğu çorbacısı ma‘rifetiyle ahz olunan işbu hazır bi’l-meclis Mustafa nâm kimesneyi menzillerine alıp mezbûrların bir gûne ahvâllerinden bir vechile emîn değiliz deyü sû-i hâllerini ihbâr ve mezbûrların mahallelerinden ihrâc olunmalarını iltimâs etmeleriyle mezbûr Mustafa dahi istintâk olundukda fi’l-hakīka kendüye nâ-mahrem olan mezbûre Ümmügülsüm’ün da‘vetiyle menzil-i mezbûra vardığını i‘tirâf etmeğin mezbûr Mustafa’ya taraflarından ta‘zîr buyurulup ve mezbûrûn Mehmed ve Ümmügülsüm ve Fâtıma mahalle-i mezbûreden ihrâc olunmaları bâbında fermân-ı âlî ricâsıyla bi’l-iltimâs huzûr-ı âlîlerine i‘lâm olundu. Fî 15 Recebi’l-ferd sene 1155