Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 127 Hüküm no: 9 Orijinal metin no: [2a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamal Mustafa’nın kendisini dövüp uygunsuz sözler sarf eden Ekmekçi Agop’a açtığı davadan feragat ettiği Ma‘rûz Medîne-i Üsküdar’da Büyük İskele kurbünde sâkin hamal tâifesinden Mustafa b. Mustafa tarafından ber-vech-i âtî vekîl olduğu Mehmed b. Mehmed ve Hüseyin b. Musa nâm kimesneler şehâdetleriyle sâbit olan tâife-i mezbûre kethudâsı diğer Mustafa b. Mustafa medîne-i mezbûrede mahfil-i bâbda meclis-i şer‘-i hatîrde ekmekçi ustası Agop v. Artin muvâcehesinde merkūm Agop zimmî târih-i i‘lâm günü iskele-i mezkûrede müvekkilim mezbûra bi-gayrı hakkın dâr-ı cehennem ol ve mâlımı sirka edersin deyü şetm ve hetk-i ırz eylediğinden gayri müvekkilim mezbûru yumruk ile darb etmekle mûcib-i şer‘îsini bi’l-vekâle taleb ederim deyü vekîl-i mezbûr eylediği da‘vâsından meccânen fâriğ olup husûs-ı mezkûra müte‘allika âmme-i de‘âvîden merkūm Agop zimmînin zimmetini bi’l-vekâle ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 3 min-Ca sene 1204