Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 127 Hüküm no: 10 Orijinal metin no: [2a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Prapyon bt. Vartan’ın vârislerinin tereke hisselerinin verilmesi talebiyle Prapyon’un kocasına açtıkları davada tarafların sulh oldukları Ma‘rûz Medîne-i Üsküdar’a muzâfe Kartal kasabasında mütemekkine iken bundan akdem hâlike olan Prapyon bt. Vartan Nasrâniyenin verâseti zevc-i metrûku Kirkor v. Agop nâm zimmî ile anası Gül bt. Haçador nâm Nasrâniyeye ve li-ebeveyn er karındaşları Gabril ve Agop zimmîlere münhasıra ve tashîh meselesi bi-hükmi’l-ferâiz altı sehmden üç sehmi zevc-i merkūma ve bir sehmi anası merkūmeye ve bâkī iki sehmi karındaşları merkūmân Gabril ve Agop zimmîlere inhisârı tahakkukundan sonra şahsı mu‘arrefe merkūm Gül Nasrâniye ile merkūmân Gabril ve Agop zimmîler meclis-i şer‘-i hatîrde tereke-i hâlike-i merkūmeye vâzı‘ü’l-yed olan zevc-i merkūm Kirkor muvâcehesinde mûrisemiz hâlike-i merkūme Prapyon Nasrâniyenin terekesinden hisse-i irsiyemiz merkūm Kirkor zimmetinde kalmağla hâlâ taleb ederim deyü da‘vâ ettiklerinde ol dahi cevâbında verese-i merkūmûn hâlike-i merkūmenin terekesinden hisse-i irsiyelerine ta‘yîn ve tahsîs olunan üç beledî yasdık ve bir Şam alacası entari ve bir çiçekli entari ve bir şalî cebe ve iki gömlek ve dört yemeniyi yedimden ahz ü kabz edip hattâ istifâ-yı hak edip zimmetimi ibrâ etmişler idi deyü takrîrine mutâbık bir kıt‘a ibrâ hücceti ibrâz eyledikde onlar dahi inkâr etmeğin bu vechile beynlerinde ba‘de vukū‘ı’l-münâza‘a bâ-tavassut-ı muslihîn verese-i müdde‘ûn-ı merkūmûn tasaddî eyledikleri da‘vâlarından yirmi beş guruş üzerine merkūm Kirkor zimmî ile an-inkârin sulh olup bedel-i sulh-ı mezkûr yirmi beş guruşu merkūm Kirkor zimmîden bi-kadri’l-hısas tamamen ahz ü kabz eylediklerinden sonra hâlike-i merkūmenin bi’l-cümle terekesine ve hukūk-ı mîrâsa müte‘allika âmme-i de‘âvîden merkūm Kirkor zimmînin zimmetini ibrâ ve ıskāt eylediklerinde ol dahi sulh ve ibrâlarını kabûl edip kat‘-ı münâza‘a eyledikleri medîne-i mezbûre bâb mahkemesinde tescîl ve bi’l-iltimâs huzûr-ı âlîlerine i‘lâm olundu. Fî 8 min-Ca sene 1204