Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 128 Hüküm no: 12 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe bt. Abdullah’ın, boşandığı kocası Mehmed ile eşi Kezban’a verdiği borç para ve kürk bedelinden alacağı olduğu iddiasıyla açtığı davayı ispat edemediği Ma‘rûz Medîne-i Üsküdar’da Pazarbaşı mahallesinde sâkine mu‘arrefetü’z-zât Habibe bt. Abdullah nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı Mehmed b. Hüseyin ile kezâlik zâtı mu‘arrefe Kezban bt. Mustafa nâm zevcân mahzarlarında mezbûrân Kezban ve Mehmed bundan akdem iştirâken yedimden bi-tarîki’l-karz istidâne ve kabz ve umûruna sarfla istihlâk eyledikleri kırk guruş ile mezbûre Kezban emlâkımdan fuzûlî âhara bey‘ ile istihlâk eylediği bir aded belekorine(?) kaplı kedi kürkünün kıymeti olan otuz guruş ki cem‘an yetmiş guruş zevcân-ı mezbûrânın zimmetlerinde hakkım olmağla taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını isbâta kādir[e] olamayıp tahlîfe dahi tâlibe olmamağla müdde‘iye-i mezbûre da‘vâ-yı mezkûresiyle mezbûrân Mehmed ve Kezban Hatun’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 13 min-Ca sene 1204