Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 133 Hüküm no: 23 Orijinal metin no: [3a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Paşa kethudası Derviş Ali Ağa’nın borcunu ödemesi Ma‘rûz Mahmiye-i İslâmbol’da Horhor’da sâkin sâhib-i arzuhâl İsmail b. Abdullah nâm kimesne medîne-i Üsküdar’da mahfil-i bâbda meclis-i şer‘-i hatîrde merhûm Osman Paşa kethudâsı derûn-ı arzuhâlde ismi mezkûr Derviş Ali Ağa b. Abdullah mahzarında mezbûr Ali Ağa târih-i i‘lâmdan iki buçuk sene mukaddem yedimden ve mâlımdan bi’d-defa‘ât istikrâz ve kabz ve umûruna sarfla istihlâk eylediği dokuz yüz elli sekiz guruş zimmetinde hakkım olup hattâ paşa-yı mûmâ-ileyh ile vilâyet-i Anadolu’da Halebü’ş-şehbâya azîmetimizde esnâ-i râhda Birecik kasabasında meblağ-ı merkūmu mezbûr Ali Ağa’dan taleb eylediğimde cihet-i mezkûreden meblağ-ı merkūm dokuz yüz elli sekiz guruş bana zimmetinde vâcibü’l-edâ deyni olduğunu huzûr-ı Müslimînde ikrâr ve i‘tirâf dahi etmekle meblağ-ı merkūm dokuz yüz elli sekiz guruşu mezbûr Derviş Ali Ağa’dan hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını lede’t-tezkiye adâletleri zâhir merhûm-ı mûmâ-ileyh etbâ‘larından el-Hâc Ali b. Halil ve Mehmed b. Ahmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle meblağ-ı merkūm dokuz yüz elli sekiz guruşu müdde‘î-i mezbûr İsmail’e edâ ve teslîme mezbûr Derviş Ali Ağa’ya şer‘an tenbîh olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 23 min-Ca sene 1204