Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 133 Hüküm no: 22 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Halo’nun Anadolu Kadıaskeri Veli Efendizade Mehmed Emin Efendi’nin dairelerine verdiği koyun etinden alacağı olduğu iddiasını ispat edemediği Ma‘rûz Mahrûse-i Galata muzâfâtından kasaba-i Beşiktaş’da mütemekkin kasab tâifesinden Halo v. Hıristo nâm zimmî medîne-i Üsküdar’da mahfil-i bâbda meclis-i şer‘-i hatîrde Sâbıkā sadr-ı Anadolu fazîletlü semâhatlü Veli Efendizâde Mehmed Emin Efendi hazretlerinin mukaddemâ vekîlharclık hizmetlerinde olan el-Hâc Mehmed Emin Ağa b. Yahya Efendi nâm kimesne mahzarında mezbûr el-Hâc Mehmed Emin Ağa târih-i i‘lâmdan on üç ay mukaddem efendi-i müşârün-ileyhin dâireleri için yedimden iştirâ ve kabz eylediği kıyye ve fiyâtı beynimizde ma‘lûm lahm-ı ganem semeninden ba‘de külli’l-hesâb beş yüz otuz üç guruş zimmetlerinde hakkım olup meblağ-ı merkūmun dört yüz guruşunu ahz ü kabz ve yüz otuz üç guruşu dahi mezbûr el-Hâc Mehmed Emin Ağa efendi-i müşârün-ileyhden benim için tamamen ahz ü kabz etmiş iken hâlâ bana teslîm etmeyip zimmetinde kalmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını isbâta kādir olamayıp talebiyle mezbûr el-Hâc Mehmed Emin Ağa gıbbe’t-tahlîfi’ş-şer‘î mûcebiyle müdde‘î-i merkūm Halo zimmî da‘vâ-yı mezkûresiyle mezbûr el-Hâc Mehmed Emin Ağa’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 17 min-Ca sene 1204