Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 134 Hüküm no: 25 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Simyon’un altın, para ve yüzüğünü çaldıkları iddiasıyla açtığı davayı ispat edemediği Ma‘rûz Medîne-i Üsküdar’da Ayazma mahallesinde hâs ekmekçi arzuhâlde ismi mezkûr Simyon v. Dimo nâm zimmî Çarşamba günü dîvân-ı âlîde ma‘kūd meclis-i şer‘-i hatîrde medîne-i mezbûrede Balaban İskelesi kurbünde bezirhânede mütemekkin Yağcı İstori v. Toma ve Gavril v. Toma nâm zimmîler muvâcehelerinde merkūmân İstori ve Gavril zimmîler târih-i i‘lâmdan kırk beş gün ben zikr olunan bezirhâneye müsâferet tarîkıyla varıp nehâran uykuda iken koynumda mevcûd mâlımdan bin guruşluk altın ve beş yüz guruşluk beyaz akçe ki cem‘an bin beş yüz guruşum ile bir sîm yüzüğümü koynumdan ahz ve sirka etmeleriyle merkūmân İstori ve Gavril zimmîlerden taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm Simyon zimmî ber-vech-i muharrer müdde‘âsını beyân edemeyip ızhâr-ı acz birle istihlâf etmeğin merkūmân İstori ve Gavril zimmîlerden herbiri gıbbe’t-tahlîfi’ş-şer‘î mûcebiyle müdde‘î-i merkūm Simyon zimmî da‘vâ-yı mezkûresiyle merkūmân İstori ve Gavril zimmîlere bilâ-beyyine mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 19 min-Ca sene 1204