Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 135 Hüküm no: 26 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin Üsküdar’da Ahmed Çelebi Mescidi Vakfı’na olan borcundan kalanı ödemesi için mühlet verildiği Ma‘rûz Medîne-i Üsküdar’da vâki‘ merhûm Ahmed Çelebi Mescid-i şerîfi vakfının hâlâ mütevellîsi Haseki el-Hâc Ali Ağa b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde İbrahim Efendi b. Ahmed nâm kimesne mahzarında mezbûr İbrahim Efendi benden mukaddem vakf-ı mezbûra mütevellî olan müteveffâ el-Hâc Ali yedinden mâl-ı vakf-ı mezbûrdan ve cihet-i karzdan doksan guruş istidâne ve kabz ve mukābelesinde bir musaddef çekmece ve bir bıçak rehn vaz‘ ve teslîm etmekle fekk-i rehn ile meblağ-ı merkūm doksan guruşu vakıf için taleb ederim deyü da‘vâ ve mezbûr İbrahim Efendi cevâbında mütevellî-i müteveffâ-yı mezbûr yedinden ancak yetmiş guruş istidâne ve kabz ve mukābelesinde zikr olunan çekmece ve bıçağı rehn vaz‘ ve teslîm ve meblağ-ı merkūm yetmiş guruşun dahi yirmi guruşunu müteveffâ-yı mezbûra hayatında edâ ve teslîm ve vakf-ı mezbûra elli guruş deynim bâkī kalmış idi deyü def‘-i şer‘î birle ziyâde yirmi guruşu inkâr etmeğin mezbûr İbrahim Efendi def‘-i mezkûrunu beyâna ba‘de’l-havâle müdde‘î-i mütevellî-i mezbûr ziyâde müdde‘âsını beyân edemeyip talebiyle mezbûr İbrahim Efendi’ye yemîn teklif olundukda nükûl etmeğin mûcebiyle mertebe-i ikrârı olan meblağ-ı merkūm elli guruş ile yemînden nükûlüyle sâbit olan yirmi guruş ki cem‘an yetmiş guruşu vakıf için mütevellî-i mezbûra edâ ve teslîme mezbûr İbrahim Efendi’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 11 min-Ca sene 1204