Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 140 Hüküm no: 37 Orijinal metin no: [4a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fahişe olduğu bilinen Çolak Hafize’nin kuyuda boğulmak suretiyle vefat ettiğinin tescil edildiği Ma‘rûz Vâ[ri]d olan fermân-ı âlîlerine imtisâlen kıbel-i şer‘den meb‘ûs Mehmed Emin Efendi dâ‘îleri medîne-i Üsküdar’da Atpazarı kurbünde Hayreddin Çavuş mahallesinde vâki‘ Kassâm Bostanı demekle ma‘rûf bostan derûnunda mevcûd kebîr kuyuda garîkan fevt olup ihrâc olunan medîne-i mezbûrede serserî geşt ü güzâr eden fevâhiş makūlesinden Çolak Hafize nâm avratın üzerine varıp mazbûtü’l-esâmî Müslimîn müteveffiye-i mezbûrenin a‘zâsı nisvâna irâe olundukda a‘zâsında eser-i cerh ve hank misillü nesne olmayıp ancak başı taşa isâbet edip derisi sarıldığı hâlde garîkan vefât eylediği ba‘de’l-keşf ve’l-mu‘âyene defne izin birle vâki‘ hâli mezbûr dâ‘îleri mahâllinde ketb ü tahrîr ve ümenâ-i şer‘le meclis-i şer‘a gelip alâ-vukū‘ihî inhâ eylediği izzetlü bostancıbaşı ağa tarafından ta‘yîn olunan Mehmed Said Haseki kulları iltimâsıyla huzûr-ı âlîlerine i‘lâm olundu. Fî 5 min-C sene 1204