Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 139 Hüküm no: 36 Orijinal metin no: [4a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Asvador’un, vefat eden Hacı Mustafa’dan alacağı olduğunu ispatı ve terekeden ödenmesi Ma‘rûz Medîne-i Üsküdar’da Atpazarı’nda mütemekkin Avanis v. Asvador nâm zimmî medîne-i mezbûrede mahfil-i bâbda meclis-i şer‘-i hatîrde Şemsiye bt. el-Hâc Mustafa nâm hatun tarafından vekîl-i müseccel-i şer‘îsi ve zevci es-Seyyid Ahmed Ağa b. Ali nâm kimesne mahzarında müvekkile-i mezbûrenin babası mezbûr el-Hâc Mustafa bundan akdem yedimden iştirâ ve kabz eylediği aded ve fiyâtı beynimizde ma‘lûm sahtiyân semeninden yirmi yedi guruş otuz para zimmetinde hakkım olup kable’l-edâ mezbûr el-Hâc Mustafa vefât edip verâseti dahi ancak kerîmesi mezbûre Şemsiye Hatun’a münhasıra ve terekesine vâzı‘atü’l-yed olmağla taleb ederim deyü ba‘de’d-da‘vâ ve’l-istintâk vekîl-i mezbûr cevâbında zevcesi müvekkile-i mezbûre müteveffâ-yı mezbûrun terekesine vâzı‘atü’l-yed olduğunu lâkin semen-i merkūmdan meblağ-ı mezbûr yirmi yedi guruş otuz para deyni olduğunu inkâr etmeğin müdde‘î-i merkūm ber-vech-i muharrer müdde‘âsını Molla Mustafa b. Osman ve es-Seyyid Yakub b. Mehmed nâm kimesneler şehâdetleriyle bi’l-muvâcehe ba‘de’l-isbât ve’t-tahallüf mûcebiyle meblağ-ı merkūm yirmi yedi guruş otuz parayı müdde‘î-i merkūma edâya müvekkilesine izâfetle vekîl-i mezbûra şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 18 min-Ca sene 1204