Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 140 Hüküm no: 39 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Dimitri’nin alacağının kefilleri tarafından ödenmesi Ma‘rûz Medîne-i Üsküdar’da Tenbel el-Hâc Mehmed mahallesinde Bakkāl Dimitri v. Trandafil nâm zimmî medîne-i mezbûrede mahfil-i bâbda meclis-i şer‘-i hatîrde Kosta v. Zako ve Yorgi v. Kosti nâm zimmîler muvâcehelerinde gāib ani’l-meclis diğer Yorgi v. Yanaki nâm zimmî zimmetinde ecnâs-ı zehâir semeninden olan üç yüz otuz üç guruş on üç para hakkıma bundan akdem merkūmân Kosta ve Yorgi zimmîler ile gāibân ani’l-meclis Dimo v. Ziso ve Nikola v. Yani nâm zimmîlerden herbiri ma‘an kefîl olduklarından sonra yine merkūmûndan herbiri âharın zimmetine lâzım gelen meblağa tarafeynden bi’l-emr ve’l-kabûl kefîl ve dâmin olmuşlar idi lâkin meblağ-ı merkūm üç yüz otuz üç guruş on üç paranın iki yüz iki guruşunu asıl-ı merkūm diğer Yorgi zimmî yedinden ahz ü kabz edip ve bâkī yüz otuz bir guruş on iki parayı ber-vech-i muharrer kefâletlerine binâen merkūmân Kosta ve Yorgi zimmîlerden taleb ederim deyü da‘vâ onlar dahi cevâblarında fi’l-hakīka meblağ-ı merkūma ma‘an kefâletlerini ikrâr ve herbiri âharın zimmetine lâzım gelen meblağa kefîl olduklarını inkâr etmeğin müdde‘î-i merkūm ber-vech-i muharrer müdde‘âsını isbâtdan ızhâr-ı acz edip talebiyle merkūmân Kosta ve Yorgi zimmîlerden herbiri gıbbe’t-tahlîfi’ş-şer‘î mûcebiyle merkūmân Kosta ve Yorgi zimmîler meblağ-ı bâkī-i merkūmdan hisselerine isâbet eden otuz ikişer guruş otuz üçer paradan cem‘an altmış beş guruş yirmi altı parayı müdde‘î-i merkūm Dimitri zimmîye edâsıyla şer‘an ilzâm olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 16 min-Ca sene 1204