Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 144 Hüküm no: 45 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Hacı Ali’nin, Kıbti Fındık Mahmud’a sattığı katır bedelinden kalan alacak davasını ispat edemediği Ma‘rûz Medîne-i Üsküdar’da Ahmedçelebi mahallesinde sâkin Mahmud b. el-Hâc Ali nâm kimesne medîne-i mezbûrede mahfil-i bâbda meclis-i şer‘-i hatîrde şahsı mu‘arrefe Zeliha bt. İsmail nâm Kıbtiye muvâcehesinde mezbûre Zeliha’nın li-ebeveyn er karındaşı gāib ani’l-beled Fındık Mahmud nâm Kıbtî’ye târih-i i‘lâmdan dört ay mukaddem yedimden iştirâ ve kabz eylediği bir res al bârgir semeninden elli guruş hakkımın yirmi üç guruşunu mezbûr Mahmud yedinden ahz bâkī yirmi yedi guruşa mezbûre Zeliha kefîl olmağla kefâletine binâen taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyân edemeyip bi’t-taleb mezbûre Zeliha gıbbe’t-tahlîfi’ş-şer‘î mûcebiyle müdde‘î-i mezbûr husûs-ı mezkûrda mezbûre Zeliha’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 26 min-Ca sene 1204