Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 143 Hüküm no: 44 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Kadı evladının, vakfın 1203 senesi gelirlerinden kendilerine isabet eden hisselere ait paranın ödenmesi talebiyle mütevelliye açtıkları davada vakfın mütevellisinin ödemeyi taahhüt ettiği Ma‘rûz Medîne-i Üsküdar hâricinde medfûn Sarı Kādı evlâdından Mehmed Emin Efendi b. Salih ve Abdülgani b. Abdurrahman ve Ahmed ve Mustafa ibney Mustafa nâm kimesneler ile mu‘arrefetü’z-zât Nefise ve Meryem bintey Veli ve Emine bt. Mustafa nâm hatunlar medîne-i mezbûrede mahfil-i bâbda meclis-i şer‘-i hatîrde sâlifü’z-zikr Sarı Kādı Vakfı’nın şeyhi ve hâlâ mütevellîsi İbrahim b. Hasan mahzarında mütevellî-i mezbûr vakf-ı mezbûrun senevî îrâd-ı mu‘ayyenesini kabz ve mesârifini ba‘de’l-ihrâc bâkī kalan meblağ evlâd-ı vâkıf beynlerinde ale’s-seviye taksîm olunmak meşrûta olmağla mütevellî-i mezbûrun bin iki yüz üç senesi Muharremi’l-harâm’ı gurresinden vakf-ı mezbûrun arâzisinden öşr olmak üzere kırk iki keyl buğday kıymeti olan yüz altmış sekiz guruş ve altmış dokuz keyl yulaf kıymeti olan altmış dokuz guruş ve otlak kıymeti olan yirmi guruş ki cem‘an iki yüz elli yedi guruş makbûzu olup vakf-ı mezbûrun mesârif-i mu‘ayyenesi için yüz guruş fürû-nihâde olunup bâkī kalan yüz elli yedi buçuk guruş bizim ve sâir İbrahim ve Emine ve Zeyneb ve diğer Emine ve Âişe ve Hadice ve Rahime ve Fatıma ve diğer Âişe ve diğer Âişe ve Kerime ve Saliha ve Mehmed nâm on üç nefer evlâdın hisselerimize isâbet eden yedişer buçuk guruşu edâ etmeyip zimmetinde olmağla suâl olunup ber-vech-i muharrer bizim hisselerimizi teslîme tenbîh olunmak matlûbumuzdur dediklerinde mezbûr İbrahim dahi ol-mikdâr meblağ ahzını ikrâr ve meblağ-ı bâkī-i merkūm yüz elli yedi buçuk guruşu şart-ı vâkıf üzere evlâdın herbirine ber-minvâl-i muharrer yedişer buçuk guruş teslîme ta‘ahhüd eyledikde onlar dahi râzîler olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-Ca sene 1204