Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 147 Hüküm no: 52 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Foti v. Panayot ile hanımı Aksandrı’nın vârislerinden oğlu Vasil’in, mirasdan olan evdeki hissesinin verilmesi talebiyle kız kardeşi Kasandra’ya açtığı davada Kasandra’nın evin tamamının kendisine ait olduğunu ispat ettiği Ma‘rûz Medîne-i Üsküdar’a tâbi‘ Kādı karyesinde mütemekkin iken bundan akdem hâlik olan Foti v. Panayot nâm zimmînin verâseti zevcesi Aksandrı bt. Azagi nâm Nasrâniye ile sulbî kebîr oğlu Vasil ve kebîre kızları Kasandra ve Elenice’ye münhasıra ba‘dehû merkūme zevce-i mersûme Aksandrı Nasrâniye dahi hâlike olup verâseti oğlu merkūm Vasil ve kızları mersûmetân Kasandra ve Elenice’ye münhasıra ve tashîh meseleleri bi-tarîki’l-münâsahati otuz iki sehm i‘tibârıyla on altı sehmi oğlu merkūm Vasil’e ve sekiz sehmden on altı sehmi kızları mersûmetâna isâbeti tahakkukundan sonra merkūm Vasil zimmî medîne-i mezbûrede mahfil-i bâbda meclis-i şer‘-i hatîrde zikri âtî menzile vâzı‘atü’l-yed olan şahsı mu‘arrefe merkūme Kasandra Nasrâniye muvâcehesinde karye-i mezbûrede vâki‘ etrâf-ı erba‘ası Sava zimmî ve Apostol zimmî ve Kosti zimmî mülkleri ve tarîk-ı âm ile mahdûd ma‘lûmü’l-müştemilât bir bâb mülk menzil babamız hâlik-i merkūmun hayatında ile’l-helâk yedinde mülk ve ba‘de hâlikihî tashîh-i mezkûr üzere bize mevrûs olmuş iken kız karındaşım merkūme Kasandra Nasrâniye menzil-i mezkûrun mecmû‘una bi-gayrı hakkın vaz‘-ı yed etmekle ber-tashîh-i merkūm bana isâbet eden on altı sehm hisse-i şâyi‘adan keff-i yed ve bana teslîme tenbîh olunmak matlûbumdur deyü da‘vâ ve mersûme Kasandra Nasrâniye cevâbında fi’l-hakīka menzil-i mezkûr mukaddemâ babamız hâlik-i merkūmun mülkü iken yirmi yedi sene mukaddem hâl-i sıhhatinde menzil-i mezkûru zevcesi anamız hâlike-i merkūme Aksandrı Nasrâniye[ye] iki yüz elli guruşa bey‘ ve temlik ol dahi ba‘de’l-iştirâ bir sene mürûrunda nısf-ı şâyi‘ini dâmâdı zevcim Kosti zimmîye yüz guruşa bey‘ ve temlik edip ba‘dehû zevcim merkūm Kosti zimmî hâlik oldukda nısf menzil-i mezkûr sekiz sehm i‘tibârıyla bir sehmi bana ve yedi sehmi kızım diğer Elenice’ye mevrûs olmağla târih-i i‘lâmdan iki sene mukaddem anamız hâlike-i merkūme Aksandrı Nasrâniye hâl-i sıhhatinde yedinde bâkī kalan nısf menzil ile kızım mersûme Elenice Nasrâniye dahi nısf-ı âhirinde olan yedi sehm hisse-i şâyi‘asını bâ-hüccet-i şer‘iye bana bey‘ ve temlik edip ol-vechile mecmû‘-ı menzil-i mezkûr benim irsen ve şirâen mülküm olmağla bi-hakkın vaz‘-ı yed ederim deyü ba‘de’d-def‘ ve’l-inkâr merkūme Kasandra Nasrâniye def‘-i mezkûrunu udûlden Molla Mehmed b. İbrahim ve Mehmed Emin b. Mehmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle merkūm Vasil zimmî da‘vâ-yı mezkûresiyle kız karındaşı merkūme Nasrâniyeye mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 9 min-C sene 1204