Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 147 Hüküm no: 51 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdülhamid’in alacak talebiyle Ahmed Efendi’ye açtığı davada haklı olduğu ve ödeme için tenbihte bulunulduğu Ma‘rûz Mahmiye-i İslâmbol’da Mevlevîhâne Kapısı dâhilinde Mimâr mahallesinde sâkin es-Seyyid Abdülhamid b. es-Seyyid Ahmed nâm kimesne medîne-i Üsküdar’da mahfil-i bâbda meclis-i şer‘-i hatîrde Ahmed Efendi b. Mustafa mahzarında mezbûr Ahmed Efendi târih-i i‘lâmdan iki ay mukaddem işbu yedimde olan mu‘anven ve mersûm temessük mantûkunca yedimden istikrâz ve kabz ve umûruna sarfla istihlâk eylediği elli guruş ve yine yedimden ve mâlımdan iştirâ ve kabz eylediği on vakıyye duhân semeninden otuz guruş ve kahve semeninden on guruş ve bir Ahmediye kuşağı semeninden üç guruş ki cem‘an doksan üç guruş zimmetinde hakkım olup hattâ târih-i i‘lâmdan elli gün mukaddem kendi dükkânımda hesâb gördüğümüzde duhân semeninden otuz guruş ve kahve semeninden on guruş ki ciheteyn-i mezkûreteynden meblağ-ı mecmû‘-ı merkūm doksan üç guruş bana deyni olduğunu ikrâr dahi etmekle hâlâ taleb ederim deyü da‘vâ ol dahi cevâbında ancak ber-mantûk-ı temessük elli guruş ile duhân semeninden on iki guruş ve kahve semeninden beş guruş ve Ahmediye semeninden üç guruş ki cem‘an yetmiş guruş deyni olduğunu ikrâr ziyâdeyi inkâr etmeğin müdde‘î-i mezbûr es-Seyyid Abdülhamid ziyâde müdde‘âsından ber-vech-i muharrer duhân semeninden otuz guruş ve kahve semeninden on guruş deynimdir deyü mezbûr Ahmed Efendi’nin ikrâr-ı meşrûhunu adâletleri zâhir olan İsmail b. Halil ve Mehmed Sadık b. el-Hâc Ebûbekir nâm kimesneler şehâdetleriyle bi’l-muvâcehe isbât etmeğin mûcebiyle meblağ-ı mezbûr doksan üç guruşu müdde‘î-i mezbûr es-Seyyid Abdülhamid’e edâ ve teslîme mezbûr Ahmed Efendi’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 7 min-C sene 1204