Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 149 Hüküm no: 54 Orijinal metin no: [5b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Hasan’ın Ahmed Bölükbaşı’ya sattığı evin bedelinden kalan alacağını ödemesi talebiyle Ahmed Bölükbaşı’nın kefili Musa Efendi’ye açtığı davada haksız bulunduğu Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûrede sâkin Bostanî Hasan b. Ömer meclis-i ma‘kūd-ı mezkûrda Musa Efendi b. Nebi mahzarında bundan akdem el-Hâc Abdullah ve Hadice nâm zevcânın Kapan-ı Dakīk Câmi‘i’nde mevzû‘ kürsî vakfı musakkafâtından olup karye-i mezbûrede vâki‘ ma‘lûmü’l-hudûd ve’l-müştemilât bir bâb menzilimi hâzır bi’l-meclis Bostanî Ahmed Bölükbaşı b. Mustafa’ya dört yüz seksen guruş bedel mukābelesinde bâ-ma‘rifet-i mütevellî ferâğ ve tefvîz ve bedel-i mezkûrun üç yüz guruşunu ahz ve istifâ ve bâkī yüz seksen guruş için mezbûr Bostanî Ahmed Bölükbaşı bir kıt‘a temessük i‘tâ ve edâsına mezbûr Musa Efendi kefîl ve dâmin olmuş idi lâkin meblağ-ı bâkī-i merkūm yüz seksen guruşun yüz elli guruşunu dahi asıl-ı mezbûrdan ahz ve mâ‘adâ otuz guruşu mezbûr Musa Efendi’den kefâletine binâen taleb ederim deyü takrîri üzere bedel-i ferâğ deyn-i sahîhden olmayıp kefâlet iddi‘âsı dahi meşrû‘a olmadığından mâ‘adâ müdde‘î-i mezbûr meblağ-ı bâkī-i merkūm otuz guruşu rızâsıyla hatt ü tenzîl ve mezbûr Bostanî Ahmed Bölükbaşı’nın yed ve zimmetinde aslâ hakkı bâkī kalmadı deyü yedinde olan temessüğü dahi şakk eylediği ikrâr ü i‘tirâf edip ve mûcebiyle müdde‘î-i mezbûr husûs-ı mezkûrda mezbûr Musa Efendi’ye bî-vech mu‘ârazadan men‘ olunduğu ba‘de’l-inhâ bi’l-iltimâs huzûr-ı âlîlerine i‘lâm olundu. Fî-selhi Ca sene 1204