Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 156 Hüküm no: 67 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. İbrahim ile hanımı Havva’nın kendilerine küfür ve hakaret ettikleri iddiasıyla açtıkları davadan vazgeçtikleri Ma‘rûz Medîne-i Üsküdar’a tâbi‘ Bulgurlu karyesi sükkânından Hüseyin b. İbrahim ile mu‘arrefetü’z-zât Havva bt. Halil nâm hatun medîne-i mezbûrede mahfil-i bâbda meclis-i şer‘-i hatîrde karye-i mezbûre sükkânından olup kendi nefsinden asıl ve Mustafa b. İsmail ve İsmail b. ( ) taraflarından ber-vech-i âtî vekîl-i şer‘îleri olan Osman b. Osman nâm kimesne mahzarında mezbûrûn Osman ve Mustafa ve İsmail târih-i i‘lâmdan üç gün mukaddem beyne’l-ışâ’eyn karye-i mezbûrede menzilimiz kapısı önüne gelip bize şütûm-ı galîza ile şetm ve ırzımızı hetk etmeleriyle mûcib-i şer‘îsini taleb ederim deyü da‘vâ ve beynlerinde ba‘de vukū‘ı’l-münâza‘a bâ-tavassut-ı muslihîn müdde‘iyân-ı mezbûrândan herbiri da‘vâ-yı mezkûrelerinden meccânen fâriğler olup husûs-ı mezkûra müte‘allika âmme-i de‘âvîden mezbûrûn Osman ve Mustafa ve İsmail’den herbirinin zimmetlerini ibrâ ve ıskāt ol dahi ber-minvâl-i muharrer asâleten ve vekâleten ibrâlarını kabûl edip lâkin zevcân-ı mezbûrânın mezbûrûndan emniyetleri olmayıp istikfâl etmeleriyle mezbûrûn Osman ve Mustafa ve İsmail’den herbiri fîmâ-ba‘d kendi hâlinde ırzlarıyla mukayyedler olup zevcân-ı mezbûrâna hilâf-ı şer‘-i şerîf vaz‘ ü hareket etmemek üzere mezbûrûnun nefislerine ve hîn-i mutâlebede huzûr-ı hükkâma ihzârlarına karye-i mezbûre sükkânından hâzır bi’l-meclis diğer Osman b. Abdullah ve diğer İsmail b. İbrahim ve Mehmed Emin b. Ahmed nâm kimesnelerden herbiri tekeffül ve kefâletleri tescîl ve bu vechile beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 15 min-C sene 1204