Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 156 Hüküm no: 66 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Ağa’nın emanet olarak verdiği eşyalarını teslim aldığı Ma‘rûz Medîne-i Üsküdar’da Yeniçeşme kurbünde misâfiren sâkin es-Seyyid Mehmed Ağa b. Hasan medîne-i mezbûrede mahfil-i bâbda meclis-i şer‘-i hatîrde Süleyman b. Abdullah mahzarında târih-i i‘lâmdan üç gün mukaddem emlâkımdan mecmû‘-ı kıymetleri yüz elli guruşa bâliğ bir sâye kaput ve bir yağmurluk kesesi ve bir gaddâre ve bir topuz ve bir semmûr kürk ve bir sincab kürk ve bir entari ve bir don ve bir gömlek ve bir havlu ve iki peşkir ve bir başlık ve bir sîne-bend ve bir hançerimi bi-tarîki’l-emâne mezbûr Süleyman yedine teslîm ve hâlâ a‘yânı yedinde mevcûd olmağla bana teslîme tenbîh olunmak matlûbumdur deyü da‘vâ ol dahi ikrâr ve eşyâ-i mezkûreyi meclis-i şer‘de bi-a‘yânihâ müdde‘î-i mezbûra def‘ ü teslîm eyledikde ol dahi tamamen ahz ü kabz eylediği ba‘de’t-tescîl bi’l-iltimâs huzûr-ı âlîlerine i‘lâm olundu. Fî 20 min-C sene 1204