Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 381 Hüküm no: 386 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa’nın eşi Ahmed Beşe’nin öldüğünü şahitlerle ispat ettiği İhbâr. Mahmiye-i İstanbul’da merhûm ve mağfûrun-leh Sultan Süleyman Hân -tâbe serâhu- Câmi‘-i şerîfi kurbünde taş odaların birinde sâkine sâhibetü hâzihi’l-vesîka Fâtıma bt. Mustafa nâm hatundan ber-vech-i âtî istîcâr-ı şer‘î sudûrundan sonra udûl-i Müslimînden ve Dergâh-ı âlî -dâme mahfûfen bi’l-me‘âlî- yeniçerilerin altmış birinci solaklara mahsûs oda neferâtından İbrahim Beşe b. İsmail ve Halil Beşe b. el-Hâc Ahmed nâm kimesneler li-ecli’l-ihbâr meclis-i şer‘a hâzırân olup isre’l-istihbâr fi’l-vâki‘ işbu müstecire-i mezbûrenin zevci zikrolunan oda neferâtından refîkimiz olan Ahmed Beşe b. Şa‘ban b. Ali târih-i kitâbdan bir sene mukaddem şark cânibinde vâki‘ Tebriz kal‘asında hasta ve bi-emri’llâhi te‘âlâ vefât eyledi biz cenâze ve defnine hâzır olduk deyü her biri alâ-tarîkı’ş-şehâde haber vermeğin hıfzan li’l-makāl mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-şehri Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Tahtacı Mehmed Çelebi b. Abdullah, Kādızâde İbrahim b. Mustafa, Abdullah Çelebi b. Mustafa, es-Seyyid Ali b. Mustafa, Ali Usta b. ( ), Ahmed Çelebi b. Hasan.