Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 161 Hüküm no: 77 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Halil’in, eniştesi Hasan’da kalan alacağını ödemesi için Hasan’a tenbihte bulunulduğu Ma‘rûz Medîne-i Üsküdar’da Vâlide-i Atik mahallesinde sâkine mu‘arrefetü’z-zât Nefise bt. Halil nâm hatun medîne-i mezbûrede mahfil-i bâbda meclis-i şer‘-i hatîrde eniştesi Hasan b. Mustafa nâm kimesne mahzarında târih-i i‘lâmdan yirmi beş gün mukaddem mezbûr Hasan bana eşyâ-i ma‘lûme iştirâ etmek için yedine ber-vech-i peşîn teslîm eylediğim yüz on sekiz buçuk guruş ve bir defa dahi yetmiş guruş ki cem‘an yüz seksen sekiz buçuk guruş hakkımın yüz on sekiz buçuk guruşu ile eşyâ iştirâ ve bana teslîm ve bâkī yetmiş guruşu zimmetinde kalmağla meblağ-ı bâkī-i merkūm yetmiş guruşu hâlâ taleb ederim deyü da‘vâ ve mezbûr Hasan cevâbında müdde‘iye-i mezbûre yedinden ancak eşyâ iştirâ ettiği meblağ-ı mezbûr yüz on sekiz buçuk guruşu ahzını ikrâr ziyâde yetmiş guruşu ba‘de’l-inkâr müdde‘iye-i mezbûre ziyâde yetmiş guruş müdde‘âsını lede’t-tezkiye adâletleri zâhir olan Kalyoncu Ali b. Mehmed nâm kimesne ile nisâ tâifesinden Fatıma bt. Mehmed ve Hadice bt. Ömer nâm hatunlar şehâdetleriyle vech-i şer‘î üzere muvâcehesinde isbât etmeğin mûcebiyle meblağ-ı bâkī-i merkūm yetmiş guruşu müdde‘iye-i mezbûreye edâ ve teslîme mezbûr Hasan’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 25 min-C sene 1204