Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 162 Hüküm no: 78 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hüseyin’in, gizlice evine girip eşyalarını alan Mehmed b. Ömer ve Ahmed b. İbrahim’e açtığı davada tarafların sulh oldukları Ma‘rûz Medîne-i Üsküdar’da Şücâbağı mahallesinde sâkine mu‘arrefetü’z-zât Emine bt. Hüseyin medîne-i mezbûrede mahfil-i bâbda meclis-i şer‘-i hatîrde Mehmed b. Ömer ve Ahmed b. İbrahim mahzarlarında mezbûrân Mehmed ve Ahmed târih-i i‘lâmdan on gün mukaddem mahalle-i mezbûrede vâki‘ sâkine olduğum menzilime hufyeten duhûl ve fuzûlî emlâkımdan mecmû‘-ı kıymetleri on beş guruşa bâliğ bir tek piştov ve bir saban demiri ve bir pulluk demiri ve sekiz sahan ve bir tencere ve bir âbdest ibriği ve üç beledî yasdık ahz ü kabz etmeleriyle zikr olunan bir tek piştov ve saban demiri ve pulluk demirini yedlerinden ahz ü kabz ve mâ‘adâ eşyâ-i muharrere-i mezkûre yedlerinde olmağla mevcûd ise a‘yânının müstehleke ise kıymet-i mezkûresini taleb ederim deyü eylediği da‘vâsından bâ-tavassut-ı muslihîn on guruş bedel-i makbûza mezbûrân Mehmed ve Ahmed ile sulh olup husûs-ı mezkûra ve zikr olunan eşyâların aynlarına ve ziyâde kıymetlerine müte‘allika âmme-i de‘âvîden mezbûrân Mehmed ve Ahmed’den herbirinin zimmetlerini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 25 min-C sene 1204