Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 166 Hüküm no: 86 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Dimitri’nin dükkânında sebzecilik yapan ve kira anlaşması feshedilen Sava v. Hıristo’nın bir daha dükkân açmasına izin verilmemesi Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Mustafa Efendi dâ‘îleri medîne-i Üsküdar’a tâbi‘ Kādı karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûrede mütemekkin Yani v. Dimitri nâm zimmî meclis-i ma‘kūd-ı mezkûrda zikri âtî bakkāl dükkânında müşâhereten müsteciri Sava v. Hırist[o] nâm zimmî muvâcehesinde merkūm Sava zimmî karye-i mezbûrede vâki‘ lede’l-ahâli ve’l-cîrân ma‘lûmü’l-hudûd taht-ı icâremde olan bir bâb bakkāl dükkânı derûnunda mevcûd beyne’l-esnâf gedik ta‘bîr olunur ber-mûceb-i defter-i müfredât âlât-ı lâzıme-i ma‘lûmemi beher mâh yüzer para ücret ile istîcâr ve dükkân-ı mezkûrda sebze bey‘ edip lâkin işbu târih-i i‘lâm şehri gāyetinde fesh-i icâre birle dükkân-ı mezkûru [tahliye] ve bana teslîme tenbîh olunmak matlûbumdur deyü ba‘de’d-da‘vâ ve’l-istintâk ve’l-ikrâr mûcebiyle gāyet-i şehr-i mezkûrda dükkân-ı mezkûr tahliye ve müdde‘î-i mezbûra teslîme ba‘de’t-tenbîh karye-i mezbûre ahâlisinden İmâm es-Seyyid Mehmed Emin Efendi b. Hasan ve el-Hâc Mustafa b. Hasan ve Mustafa b. Süleyman ve Abdi Efendi b. el-Hâc İbrahim ve Mahmud Ağa b. Hüseyin ve İsmail b. el-Hâc Ahmed ve es-Seyyid Veli b. es-Seyyid Ahmed ve es-Seyyid İsmail b. es-Seyyid Ahmed ve Mustafa b. Hasan ve sâir Müslim ve re‘âyâ müstecir-i merkūm Sava zimmî için evzâ‘ ve etvârından râzı ve hoşnû[d] değilleriz ve dâimâ bizi ta‘cîz ve tekdîr edip emniyetimiz yokdur deyü muvâcehesinde teşekkî ve fîmâ-ba‘d karye-i mezbûrede kendi bostanında meks ve ikāmet âhar dükkân küşâdıyla meks ve ikāmet etmemek üzere fermân-ı âlîleri sudûrunu istirhâm eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî-selhi Cumâdelâhire sene 1204