Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 167 Hüküm no: 88 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristolani bt. Dimitri’nin, Manol v. Atam’a verdiği borca karşılık kira ve rehniyet iddiasını ispat edemediği Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Mustafa Efendi dâ‘îleri medîne-i Üsküdar’a tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûrede mütemekkine ve şahsı mu‘arrefe Hıristolani bt. Dimitri nâm Nasrâniye meclis-i ma‘kūd-ı mezkûrda Manol v. Atam nâm zimmî muvâcehesinde merkūm Manol zimmî târih-i i‘lâmdan iki buçuk sene mukaddem mâlımdan ve yedimden istikrâz ve kabz ve umûruna sarfla istihlâk eylediği dört yüz guruş deyni mukābelesinde karye-i mezbûrede vâki‘ lede’l-ahâli ve’l-cîrân ma‘lûmü’l-hudûd bir bâb mülk menzilini bi-tarîki’l-istiğlâl bilâ-hüccet beynimizde bana bey‘ ve teslîm eyledikde ben dahi iştirâ ve kabûl ve menzil-i mezkûru ba‘de’t-tahliye senevî kırkar guruş ücret ile yine merkūm Manol zimmîye îcâr ve teslîm ve ücret-i mezkûreden iki senelik seksen guruşunu yedinden ahz ü istifâ etmiş idim hâlâ asıl mâl-ı mezkûr dört yüz guruş ile ücret-i mezkûreden altı aylık yirmi guruş ki cem‘an dört yüz yirmi guruş hakkımı taleb ederim deyü da‘vâ ve merkūm Manol zimmî cevâbında fi’l-hakīka müdde‘iye-i mezbûre yedinden karz olmak üzere dört yüz guruş ahzını ikrâr lâkin müdde‘iye-i mezbûre kabzını mu‘terife olduğu seksen guruşu deyn-i mezkûr dört yüz guruşa mahsûben yedine def‘ ü teslîm edip zimmetimde üç yüz yirmi guruş deynim bâkī kalmış idi deyü ber-vech-i muharrer menzilini bi-tarîki’l-istiğlâl bey‘ini ve îcâr ve istîcârını inkâr ve mertebe-i ikrârı olan meblağ-ı bâkī-i merkūm üç yüz yirmi guruşun edâsıyla ba‘de’l-ilzâm müdde‘iye-i mezbûre dahi ber-minvâl-i muharrer istiğlâl ve îcâr ve istîcârı da‘vâsını beyândan ızhâr-ı acz ile istihlâf etmeğin merkūm Manol zimmî gıbbe’t-tahlîfi’ş-şer‘î mûcebiyle müdde‘iye-i mezbûre ziyâde müdde‘âsı’çün merkūm Manol zimmîye bilâ-beyyine mu‘ârazadan men‘ olunduğu ba‘de’l-inhâ bi’l-iltimâs huzûr-ı âlîlerine i‘lâm olundu. Fî 21 min-C sene 1204