Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 168 Hüküm no: 89 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed ile Ayşe bt. Mehmed’in kendilerine nâmahrem Esirci Hacı Mustafa ile yakalandıklarından cezalandırılmaları Ma‘rûz Medîne-i Üsküdar’da Hasanağa mahallesinde vâki‘ Emine bt. Mehmed’in menzilinde târih-i i‘lâm günü Esirci el-Hâc Mustafa b. Ahmed nâm kimesne kendiye nâ-mahrem ve ecnebiye olan İslâmbol sâkinelerinden Âişe bt. Mehmed nâm avrat ile icrâ-yı fısk için menzil-i mezkûra cem‘ olduklarını mahalle-i mezbûre ahâlisinden İbrahim b. İbrahim ve es-Seyyid Feyzullah b. Ömer ve es-Seyyid eş-Şeyh Safi Efendi b. eş-Şeyh Mehmed ve Ömer b. Ahmed nâm kimesneler mu‘âyene etmeleriyle Üsküdar ustası ve Vâlide-i Atik subaşısına ihbâr ve ahz [ve] tedîblerini iltimâs ve usta ve subaşı-i mezbûrân dahi ahâli-i mezbûre ile menzil-i mezkûra varıp mezbûrûn el-Hâc Mustafa ve Âişe ve Emine’yi ahz ve meclis-i şer‘a ihzâr ve istintâk olunduklarında birbirilerine nâ-mahrem ve ecnebî olup menzil-i mezkûra cem‘ oldukları hâlde ahz olunduklarını ikrâr ve mezbûrûndan herbirine şer‘an ta‘zîr lâzım geldiği bi’l-iltimâs huzûr-ı âlîlerine i‘lâm olundu. Fî 10 min-Receb sene 1204