Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 382 Hüküm no: 388 Orijinal metin no: [88b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. İsmail ile eşi Hüseyin Beşe’nin muhala‘a yoluyla boşandıkları Hul‘. Mahmiye-i İstanbul’da Hüsamefendi Mahallesi’nde sâkine Hadice bt. İsmail nâm hatun [zâtı] ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i dâhili bâ‘isü hâze’l-kitâb Hüseyin Beşe b. Receb nâm kimesne mahzarında ikrâr ve takrîr-i kelâm edip mezbûr Hüseyin Beşe zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i mu‘ayyene-i [89a] ma‘lûmem üzerlerine ve kendiye medfû‘um olan bir minder ve bir yemenî yorgan ve bir gömlek ve bir sandal anteri ve dört sahan bedel-i hul‘ olup meûnet-i süknâm dahi kendi üzerime olmak üzere zevcim mezbûr Hüseyin Beşe ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyyete müte‘allika da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah bölükbaşı, İbrahim Çelebi b. Mustafa du‘âcı, İbrahim Çelebi b. Ahmed dâmâd, Ya‘kub Çelebi b. Abdullah muhzır, Urfalı Mustafa Çelebi muhzır.