Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 383 Hüküm no: 389 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühanî bt. el-Hâc Hüseyin ile eşi el-Hâc Mehmed’in muhala‘a yoluyla boşandıkları Muhâla‘a. Mahmiye-i İstanbul’da Karagümrük kurbünde Alipaşa-yı atîk Mahallesi sâkinelerinden zâtı ba‘de’t-ta‘rîfi’ş-şer‘î mu‘arrefe bâ‘isetü’l-kitâb Ümmühani bt. el-Hâc Hüseyin nâm hatun meclis-i şer‘-i hatîr-i lâzımü’t-tevkīrde zevc-i dâhili el-Hâc Mehmed b. Davud b. Abdullah tarafından hul‘-ı âti’l-beyânı tasdîk ve ibrâya mahalle-i mezbûre sükkânından Ahmed b. Mehmed ve Osman b. Ömer nâm kimesneler şehâdetleriyle şer‘an vekâleti sâbit ve sübût-ı vekâletine hükm-i şer‘-i lâhık olan Selim b. Hüseyin nâm kimesne mahzarında ikrâr ve takrîr-i kelâm edip zevcim merkūm el-Hâc Mehmed ile beynimizde hüsn-i zindegānemiz olmamağla hul‘a tâlibe ve mufârakata râgıbe olduğumda zimmetinde mütekarrir ve ma‘kūdun-aleyh olan üç yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerine ve meûnet-i süknâm dahi kendi üzerime olmak üzere vekîl-i mezbûr Selim ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer bi’l-vekâle hul‘-ı mezbûru ba‘de’l-kabûl hukūk-ı zevciyyete ve sâire müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: İbrahim b. Mustafa, Abdullah b. Mustafa, Ahmed b. Hasan, Mehmed b. Ahmed, Mustafa b. Mehmed, Seydî Ali b. Mustafa, Mehmed Çelebi b. Abdullah.