Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 174 Hüküm no: 98 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Emine’nin evinden eşyalarını çaldıkları iddiasıyla Ahmed kızları Fatma ve Ayşe’ye açtığı davayı ispat edemediği Ma‘rûz Medîne-i Üsküdar’da Selmanağa mahallesinde sâkine mu‘arrefetü’z-zât Hacce Emine bt. İbrahim medîne-i mezbûrede mahfil-i bâbda meclis-i şer‘-i hatîrde kezâlik zâtları mu‘arrefe Âişe ve Fatıma bintey Ahmed mahzarlarında mezbûretân Âişe ve Fatıma ma‘an târih-i i‘lâmdan yirmi altı gün mukaddem mahalle-i mezbûrede vâki‘ sâkine olduğum menzilim odasına hufyeten duhûl ve tennûr üzerinde mevzû‘ emlâkimden kırk guruş kıymetli bir çift la‘l küpe ve on beş guruş kıymetli bir çift sîm kuşağımı bi’l-ma‘iye ahz ü kabz etmeleriyle mevcûd ise aynılarını müstehleke ise kıymet-i mezkûrelerini hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını isbâta kādire olamayıp talebiyle mezbûretân Âişe ve Fatıma’dan herbiri gıbbe’t-tahlîfi’ş-şer‘î mûcebiyle müdde‘iye-i mezbûre da‘vâ-yı mezkûresiyle mezbûretân Âişe ve Fatıma’ya bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 20 min-Receb sene 1204