Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 175 Hüküm no: 100 Orijinal metin no: [10a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fatma’nın Şerife bt. Ahmed’e olan borcunu ödemesi Ma‘rûz Medîne-i Üsküdar’da Selami mahallesinde sâkine mu‘arrefetü’z-zât Şerife bt. Ahmed nâm hatun medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe diğer Şerife Fatıma bt. es-Seyyid Haşim mahzarında mezbûre diğer Şerife Fatıma târih-i i‘lâmdan ve mâlımdan iştirâ ve kabz eylediği eşyâ-i mütenevvi‘a-i ma‘lûme semenlerinden otuz dokuz guruş hakkım olup hâlâ yedime işbu târih-i i‘lâm senesi Rebî‘ülâhire’nin yirmi beşinci günü târihiyle müverrah bir kıt‘a karz senedâtıyla temessük dahi i‘tâ etmekle meblağ-ı mezbûru hâlâ taleb ederim deyü da‘vâ ol dahi cevâbında meblağ-ı merkūm otuz dokuz guruş zimmetinde deyni olduğunu ikrâr lâkin meblağ-ı mezbûr mukābelesinde bi-tarîki’r-rehn mezbûre Şerife Fatıma Hatun’a teslîm eylediğim on beş guruş kıymetli bir siyâh kedi kürkü ve bir nîmtenimi benim iznimsiz âhara bey‘ ile istihlâk etmekle kıymet-i mezkûresi olan on yedi buçuk guruşu da‘vâ ve mezbûre Şerife Fatıma cevâbında zikr olunan kürk ile nîmteni dört buçuk guruşa mezbûre diğer Şerife Fatıma’nın izinsiz âhara bey‘le istihlâk ettiğini ikrâr ziyâde kıymetini inkâr etmeğin mezbûre diğer Şerife Fatıma hîn-i bey‘de eşyâ-i mezkûrenin kıymeti on yedi buçuk guruş idiği lede’t-tezkiye adâletleri zâhir olan Mehmed b. Ali ve Memiş b. Mustafa nâm kimesneler şehâdetleriyle muvâcehesinde isbât etmeğin mûcebiyle meblağ-ı merkūm on yedi guruşu bâlâda mezkûr otuz dokuz guruşun on yedi buçuk guruşuna ba‘de’l-mahsûb bâkī kalan yirmi bir buçuk guruşu müdde‘iye-i mezbûreye edâsıyla mezbûre diğer Şerife Fatıma Hatun’a şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 28 min-C sene 1204