Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 176 Hüküm no: 101 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Halil ile komşusu İbrahim’in müşterek duvarlarını yıkıp birbirilerine zarar vermeyecek şekilde yeniden inşa etmek üzere anlaştıkları Ma‘rûz Medîne-i Üsküdar’da Hasanağa mahallesinde sâkine Fatıma bt. Halil tarafından vech-i âtî üzere vekîl olduğu zâtını ârifân Ali Ağa b. Mehmed ve Abdülgani b. Abdülkerim nâm kimesneler şehâdetleriyle sâbit olan es-Seyyid eş-Şeyh Mehmed Şûhî Efendi b. Ali medîne-i mezbûrede mahfil-i bâbda meclis-i şer‘-i hatîrde câr-ı mülâsıkı İbrahim b. Ebûbekir nâm kimesne mahzarında mezbûr İbrahim’in menzili ile müvekkilem mezbûrenin menzillerinin duvarı müşterek olup mezbûr İbrahim menzilini hedm ve müceddeden duvar inşâ ve duvar-ı mezkûrun üzerine kendi binâsının sütûnlarını vaz‘ ve müvekkile-i mezbûre dahi arsasına binâ murâd eyledikde binâsının sütûnu vaz‘ olunacak mahâlli olmamağla binâ-i mezkûrun duvarını hedm ve kadîmi üzere binâ ve ma‘an sütûnlarımızı vaz‘ edelim deyü da‘vâ ve beynlerinde ba‘de vukū‘ı’l-münâza‘a bâ-tavassut-ı muslihîn mezbûr İbrahim duvar-ı mezkûrun üzerine vaz‘ eylediği binânın duvarını dolma etmeyip dolma olacak duvar mahâlline Bağdâdî binâ etmek üzere ta‘ahhüd ve müdde‘iye-i müvekkile-i mezbûre dahi râziye olup bu vechile kat‘-ı münâza‘a olunduğu bi’l-iltimâs huzûr-ı âlîlerine i‘lâm olundu. Fî 15 min-B sene 1204