Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 181 Hüküm no: 110 Orijinal metin no: [11a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. İbrahim’in, yedi sene hizmet ettiği Fatma bt. Abdullah’a açtığı hizmet bedeli davasında sulh olduğu Ma‘rûz Mahmiye-i İslâmbol hısnı ebvâbından Samatya Kapısı kurbünde sâkin sâhib-i arzuhâl Mustafa b. İbrahim medîne-i Üsküdar’da mahfil-i bâbda meclis-i şer‘-i hatîrde arzuhâlde ismi mezkûr Fatıma bt. Abdullah nâm hatun tarafından ber-vech-i âtî vekîl olduğu zât-ı mezbûreyi bi’l-mu‘arrefeti’ş-şer‘iye ârifân Hafız es-Seyyid Hüseyin b. Ali ve kuzâtdan el-Hâc Mustafa Efendi b. el-Hâc Mehmed ile sâbit olan İmâm Hafız es-Seyyid Mehmed Tâhir Efendi b. Mehmed mahzarında ben ücret ile hizmet eder makūleden olmamla târih-i i‘lâmdan on iki sene mukaddem müvekkile-i mezbûre Fatıma Hatun’un talebiyle menzilinde hâl-i sıgārımda bilâ-tesmiyeti’l-ecr yedi sene kendiye hizmet etmemle sinîn-i mezkûrede sebk eden hizmetimin ecr-i mislini hâlâ taleb ederim deyü tasaddî eylediği da‘vâsından yirmi beş guruş bedel-i makbûza vekîl-i mezbûr ile sulh olup husûs-ı mezkûre ve hukūk-ı sâireye müte‘allika âmme-i da‘vâdan müvekkile-i mezbûrenin zimmetini ibrâ ve ıskāt eyledikde vekîl-i mezbûr dahi ber-vech-i muharrer ibrâsını kabûl edip kat‘-ı münâza‘a eyledikleri mübâşiri es-Seyyid Eyüb Çavuş kulları iltimâsıyla huzûr-ı âlîlerine i‘lâm olundu. Fî 23 min-Receb sene 1204