Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 183 Hüküm no: 115 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Osman Ağa’nın Mehmed b. Hacı Ahmed’e açtığı yaralama davasında sulh oldukları Ma‘rûz Medîne-i Üsküdar’da Bulgurlu mahallesinde sâkin ve ber-vech-i âtî mecrûh idiği lede’l-keşf ve’l-mu‘âyene zâhir olan Mustafa nâm kimesnenin babası ve tarafından ber-vech-i âtî sulh ve ibrâya vekîli olduğu Ahmed Ağa b. Süleyman ve es-Seyyid Osman b. Ali nâm kimesneler şehâdetleriyle sâbit olan Osman Ağa b. Hüseyin medîne-i mezbûrede mahfil-i bâbda meclis-i şer‘-i hatîrde Mehmed b. el-Hâc Ahmed mahzarında mezbûr Mehmed târih-i i‘lâmdan bir gece mukaddem medîne-i mezbûrede Çavuşderesi nâm mahâlde oğlum müvekkilim mezbûr Mustafa’yı hançer ile arkasının sağ küreği üzerinden bir yerinden ve sağ ayağı üzerinden bir yerinden ki cem‘an iki yerinden darb ve cerh etmekle mûcebini bi’l-vekâle taleb ederim deyü tasaddî eylediği da‘vâsından bâ-tavassut-ı muslihîn an-inkârin mezbûr Mehmed ile altmış guruş bedel-i makbûza sulh olup cerh-i mezkûra ve mâ yuhdesü minhe müte‘allıka âmme-i de‘âvîden mezbûr Mehmed’in zimmetini bi’l-vekâle ibrâ ve ıskāt eylediğinde ol dahi ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-B sene 1204