Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 190 Hüküm no: 128 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Mehmed’in, evin yarısını kocası İsmail b. Mustafa’nın kendisine ferağ ettiği iddiasıyla açtığı davayı ispat edemediği Ma‘rûz Medîne-i Üsküdar’da Davudpaşa mahallesinde sâkine mu‘arrefetü’z-zât Zeliha bt. Mehmed nâm hatun medîne-i mezbûrede mahfil-i bâbda meclis-i şer‘-i hatîrde zevci İsmail b. Mustafa muvâcehesinde medîne-i mezbûrede ashâb-ı hayrâtdan merhûm Osman Efendi vakfının bi’l-meşrûta mütevelliyesi Akıle Hatun tarafından vekîli câbî-i vakf Ali Efendi hâzır olduğu hâlde vakf-ı mezbûr musakkafâtından olup mahalle-i mezbûrede vâki‘ ber-mûceb-i temessük ma‘lûmü’l-hudûd bir bâb vakıf menzil bi’l-icâreteyn mezbûr İsmail’in tasarrufunda iken nısf-ı şâyi‘ini bana bâ-ma‘rifet-i mütevellî meccânen ferâğ ve tefvîz ben dahi tefevvüz ve kabûl etmiş idim hâlâ mezbûr İsmail’in nısf menzil-i mezkûrda alâkası yoğiken bi-gayrı hakkın tasarrufuma müdâhale etmekle suâl olunup müdâhalesi men‘ ü def‘ olunmak matlûbumdur deyü da‘vâ ve mezbûr İsmail inkâr etmeğin müdde‘iye-i mezbûre müdde‘âsını isbâta kādire olamayıp bi’t-taleb mezbûr İsmail gıbbe’t-tahlîfi’ş-şer‘î mûcebiyle nısf menzil-i mezkûru bâ-ma‘rifet-i mütevellî mezbûr İsmail’e redd ü teslîme mezbûre Zeliha’ya ferâğını dahi tahrîr ve temhîre mütevellî-i mezbûra tenbîh olunduğu bi’l-iltimâs huzûr-ı âlîlerine i‘lâm olundu. Fî 4 min-Ş sene 1204