Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 189 Hüküm no: 127 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey’in Tokat ve Bozok’daki zeameti iltizamından Hasan Ağa’da alacağı olduğu, alacak verecek davasında zimmet ibrası yaptıkları Ma‘rûz Medîne-i Üsküdar’da Sinanpaşa mahallesinde İhsaniye nâm mahâlde sâkin sâhib-i arzuhâl Hasan Bey b. Mustafa medîne-i mezbûrede mahfil-i bâbda meclis-i şer‘-i hatîrde derûn-ı arzuhâlde mezkûr Hasan Ağa b. Mehmed nâm kimesne mahzarında mezbûr Hasan Ağa Vilâyet-i Anadolu’da Tokad kazâsı ve Bozok sancağında kâin bâ-berât-ı âlî-şân mutasarrıf olduğum ze‘âmetimi yedi seneden beri âhara ilzâm ve bedelini ahz ve istihlâk eylediği iki bin dokuz yüz guruşu taleb ederim deyü da‘vâ ve mezbûr Hasan Ağa cevâbında ze‘âmet-i mezkûre bin iki yüz bir senesi Mart’ı ibtidâsından işbu bin iki yüz dört senesi Mart’ı gāyetine gelince dört sene-i kâmile âhara ilzâm ve bedelinden makbûzum olan cem‘an iki bin dokuz [yüz] guruşun beher senede iki yüz ellişer guruşdan dört senede bin guruşu ze‘âmetin cebelisı’çün mahâllinde teslîm ve bâkī bin dokuz guruşu mezbûr Hasan Bey’in iyâl ü evlâdına ve sâir meûnet-i beytine harc ve sarfa emr ve tevkîl etmekle ben dahi umûrunu rü’yet ve ber-vech-i muharrer harc ü sarf eylediğimden mâ‘adâ beynimizde ma‘lûm menzil ta‘mîri’çün kendi mâlımdan emriyle sarf eylediğim dört bin guruşu bana deyni olduğunu ikrâr ve mu‘anven mersûm bir kıt‘a temessük dahi i‘tâ etmiş idi deyü tarafeynden herbirinden da‘vâya tasaddî eylediklerinde beynlerinde ba‘de vukū‘ı’l-münâza‘a ve bâ-vesâtat-ı muslihîn müdde‘î-i mezbûr Hasan Bey ze‘âmet-i mezkûre bedeli olan meblağ-ı merkūm iki bin dokuz yüz guruşa ve işbu târih-i i‘lâma gelince cereyân eden bi’l-cümle ahz ü i‘tâya müte‘allıka âmme-i de‘âvîden mezbûr Hasan Ağa’nın ve hâzır bi’l-meclis kayınpederi Mehmed Ağa ve kayın vâlidesi Âişe Hatun’dan herbirinin zimmetlerini ibrâ ve ıskāt eyledikde mezbûr Hasan Ağa dahi sâlifü’z-zikr matlûbu olan dört bin guruşun temessüğünü fek ve yedine teslîm edip meblağ-ı merkūm dört bin guruşa müte‘allika âmme-i de‘âvîden mezbûr Hasan Bey’in zimmetini meccânen ibrâ ve ıskāt ve herbiri âharın vech-i muharrer üzere ibrâsını kabûl edip kat‘-ı münâza‘a eyledikleri tescîl ve mübâşiri Mustafa Çavuş kulları iltimâsıyla huzûr-ı âlîlerine i‘lâm olundu. Fî 12 min-Ş sene 1204