Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 191 Hüküm no: 131 Orijinal metin no: [12b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafının Kocaeli’nden getirttikleri tavuk, yumurta, tereyağı ve yoğurdu satmalarına mani olan Bakkal Anton’un men edildiği Ma‘rûz Medîne-i Üsküdar’da bakkāl esnâfından Bekir Beşe b. Mehmed ve Molla Ali b. Mehmed Emin ve Salih Beşe b. Mahmud nâm kimesneler ile zimmî ustalarından Yanaki v. Dimo ve Entimoz v. Vasil ve Tanaş v. Yani nâm zimmîler medîne-i mezbûrede mahfil-i bâbda meclis-i şer‘-i hatîrde yine esnâf-ı mezkûreden medîne-i mezbûrede Dârü’s-sa‘âde Ağası [çeşmesi] kurbünde Bakkāl Anton v. İlya nâm zimmî muvâcehesinde ez kadîm Üsküdar hâricinde Kocaili nâm mahâlde karyelerden yumurta ve tavuk ve tereyağı ve torba yoğurdu devşiren yedekci ta‘bîr olunur kimesneler kendi mâllarıyla iştirâ ve cem‘ eyledikleri sâlifü’z-zikr yumurta ve tavuk ve tereyağı ve torba yoğurdunu medîne-i mezbûreye nakl ve kadîmden ikāmet eylediği mahâlde râyici üzere bize ve sâir ibâdullâha bey‘ ederler iken bu esnâda merkūm Bakkāl Anton zimmî bi-gayrı hakkın bizi men‘ irâdesiyle bey‘ ü şirâmıza bî-vech müdâhale ve kendiye münhasır eder men‘ ü def‘ olunması matlûbumuzdur deyü teşekkî ve merkūm Anton zimmî dahi fi’l-hakīka hâl merkūmûnun takrîrleri üzere olduğunu ikrâr ve fîmâ-ba‘d müdâhale etmemek üzere ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 18 min-Ş sene 1204